ബോവിക്കാനം: പ്ലാന്റേഷന്‍ കോര്‍പറേഷന്‍ തോട്ടങ്ങളിലെ കശുവണ്ടി പൊതുമേഖല സ്ഥാപനങ്ങള്‍ക്കു വേണ്ടി സംഭരിക്കാന്‍ തീരുമാനമായതോടെ ഒരു മാസം മുമ്പ് നടന്ന ലേലം പ്രഹസനമായി. കശുവണ്ടി ശേഖരിക്കുന്ന കാര്യത്തില്‍ കോര്‍പറേഷനില്‍ അവ്യക്തത നിലനിന്നിരുന്നതിനാല്‍ ലേലം കഴിഞ്ഞ് ഒരു മാസം പിന്നിട്ടിട്ടും ലേലം ഉറപ്പിച്ചിരുന്നില്ല. മന്ത്രിമാരായ മേഴ്‌സിക്കുട്ടിയമ്മ, വി.എസ് സുനില്‍കുമാര്‍ എന്നിവരുടെ സാന്നിധ്യത്തില്‍ കഴിഞ്ഞ ദിവസം നടന്ന ചര്‍ച്ചയിലാണ് കണ്ണൂര്‍, കാസര്‍കോട് ജില്ലകളിലെ പ്ലാന്റേഷന്‍ തോട്ടങ്ങളിലെ കശുവണ്ടി കാപെക്‌സിനും കശുവണ്ടി വികസന കോര്‍പറേഷനും നല്‍കാന്‍ ധാരണയായത്. ലേലം നടന്ന് ഒരു മാസം കഴിഞ്ഞതിനു ശേഷമുള്ള അധികൃതരുടെ ഈ തീരുമാനം തോട്ടം ലേലത്തിനെടുത്തവര്‍ക്ക് വന്‍ സാമ്പത്തിക നഷ്ടത്തിനു കാരണമാവും. ലേലം കഴിഞ്ഞപ്പോള്‍ മുന്‍കൂറായി അടച്ച ഒന്നര ലക്ഷം രൂപ തിരിച്ചു ലഭിക്കുമെങ്കിലും കഴിഞ്ഞ ഒരു മാസക്കാലം തോട്ടങ്ങളില്‍ നിയമിച്ച തൊഴിലാളികളുടെ ശമ്പളവും മറ്റു ചിലവുകളുമടക്കം വന്‍തുക നഷ്ടമാവുമെന്നാണു തോട്ടം ലേലത്തിനെടുത്തവര്‍ പറയുന്നത്.
അതിനിടെ കോര്‍പറേഷന്റെ കശുവണ്ടികള്‍ പൊതുമേഖല സ്ഥാപനങ്ങള്‍ക്കു നല്‍കാന്‍ തീരുമാനമായതോടെ പല കരാറുകാരും ലേലത്തിനടുത്ത തോട്ടങ്ങള്‍ ഒഴിയുന്നതായും തോട്ടങ്ങളില്‍ നിന്നു കാവല്‍ക്കാരെ പിന്‍വലിക്കുന്നതായും അറിയിച്ചു കൊണ്ട് കോര്‍പറേഷനു കത്തു നല്‍കി.
പൊതുമേഖലാ സ്ഥാപനങ്ങള്‍ തോട്ടങ്ങളില്‍ നിന്നു നേരിട്ട് കശുവണ്ടി ശേഖരിക്കുന്നതിനു സംവിധാനമുണ്ടാക്കിയില്ലെങ്കില്‍ പി.സി.കെയില്‍ നിലവിലുള്ള തൊഴിലാളികള്‍ക്കു കശുവണ്ടി ശേഖരിക്കുന്നതും മോഷണം തടയുന്നതുള്‍പ്പെടെയുള്ള ജോലികള്‍ ഏറെ ഭാരമാകുമെന്ന് ഒരു വിഭാഗം തൊഴിലാളികള്‍ പറയുന്നു.