മലപ്പുറം: കാല്‍നൂറ്റാണ്ടുകാലം ജില്ലയെ പ്രതിനിധീകരിച്ചു ലോക്‌സഭയിലെത്തിയ ഇ. അഹമ്മദിന് ഉചിതമായ രീതിയില്‍ സ്മാരകം നിര്‍മിക്കണമെന്നു വ്യാപാരി വ്യവസായി ഏകോപന സമിതി ജില്ലാ എക്‌സിക്യൂട്ടീവ് കമ്മിറ്റി.
മഞ്ചേരി മെഡിക്കല്‍ കോളജില്‍ അദ്ദേഹത്തിന്റെ പേരില്‍ സേവന ബ്ലോക്ക് നിര്‍മിക്കണം. മഞ്ചേരി മെഡിക്കല്‍ കോളജിന് എം.ഐ.സി അംഗീകാരം നേടിയെടുക്കുന്നതിനു കേന്ദ്ര സര്‍ക്കാരില്‍ സമ്മര്‍ദം ചെലുത്തുകയും ആശുപത്രിക്കു കെട്ടിടം നിര്‍മിക്കുന്നതിന് ഏറ്റവും കൂടുതല്‍ ഫണ്ട് വകയിരുത്തുകയും ചെയ്ത ഇ. അഹമ്മദിന്റെ പേരില്‍ ജില്ലാ ആശുപത്രിയുടെ പഴയ ബ്ലോക്കിനോട് ചേര്‍ന്ന് മലപ്പുറം റോഡിന് അഭിമുഖമായി എല്ലാവിധ പരിശോധനകള്‍ക്കുമായി ഒരു പാരാമെഡിക്കല്‍ ബ്ലോക്ക് നിര്‍മിക്കുകയും വേണമെന്നും കമ്മിറ്റി ആവശ്യപ്പെട്ടു.
ജില്ലാ പ്രസിഡന്റ് ഇ.കെ ചെറി അധ്യക്ഷനായി. ജനറല്‍ സെക്രട്ടറി മുഹമ്മദ് കുട്ടി റാബിയ, സലാം വളാഞ്ചേരി, പ്രമോദ് അരിയല്ലൂര്‍, ബാബു കാരശ്ശേരി, റഫീഖ് പരപ്പനങ്ങാടി, അലി നിബ്രാസ്, സലീം അപ്‌സര എന്നിവര്‍ സംസാരിച്ചു.