പട്ടാമ്പി: അറബി കവിതക്ക് പ്രാദേശിക സംഭാവനകള്‍ എന്ന വിഷയത്തില്‍ പട്ടാമ്പി ഗവ.സംസ്‌കൃത കോളജ് അറബിക് വിഭാഗം സംഘടിപ്പിച്ച അറബി കവിത ദേശീയ സെമിനാര്‍ ശ്രദ്ധേയമായി. രചന നടത്തിയവര്‍ തന്നെ സമകാലിക കവിത ആലപിച്ച് ചടങ്ങിനെത്തിയവരെ ആശ്ചര്യപ്പെടുത്തി. അറബി സാഹിത്യത്തിനും കവിതക്കും കേരളിയര്‍ നല്‍കിയ സംഭാവനകള്‍ വളരെ വലുതായിരുന്നുവെന്ന് കരിങ്ങനാട് സലഫിയ്യ കോളജ് പ്രിന്‍സിപ്പല്‍ എ.കെ ഈസ അബൂബക്കര്‍ മദനി ഉദ്ഘാടന പ്രസംഗത്തില്‍ പറഞ്ഞു. ധാരാളം സര്‍ഗ പ്രതിഭകളുടെ രചനകള്‍ പ്രസിദ്ധീകരിക്കപ്പെടാതെ പോയിട്ടുണ്ട്. വള്ളുവനാട്, ഏറനാട് താലൂക്കുകളില്‍ ജീവിച്ചിരുന്ന ഒട്ടേറെ പണ്ഡിതര്‍ അറബികവിതയില്‍ ശ്രദ്ധേയമായ രചനകള്‍ നിര്‍വഹിച്ചവരാണന്നും അദ്ധേഹം പറഞ്ഞു.
ഫലക്കി, നൂറാനി, ഫദ്ഫരി തുടങ്ങിയ കവിത്രയങ്ങള്‍ ഇതിന്നുദാഹരണമാണന്നും അദ്ധേഹം വ്യക്തമാക്കി. പ്രിന്‍സിപ്പല്‍ പ്രൊഫ. പി.എന്‍ അനിതകുമാരി അധ്യക്ഷയായി. ധീരതക്കുള്ള അവാര്‍ഡ് നേടിയ കെ.പി ബദറുന്നീസ, സംസ്ഥാന സ്‌കൂള്‍ കലോത്സവ ജേതാവ് വി.എസ് ഫാസില്‍ എന്നിവരെ ചടങ്ങില്‍ ആദരിച്ചു.
സമകാലിക അറബി കവികളായ മുഹമ്മദ് ഫാറൂഖി, പുലാമന്തോള്‍ അബൂബക്കര്‍, അസീസ് ഫാറൂഖി, അബ്ദുള്ള അമാനത്ത് രചനകള്‍ ആലപിച്ചു. കാസര്‍ക്കോട് ഗവ.കോളജ് അറബിക് വിഭാഗം മേധാവി ഡോ. നൂറുല്‍ അമീന്‍, മഹാരാജാസ് കോളജ് റിസര്‍ച്ച് സ്‌കോളര്‍ ഷാഹിമോന്‍, ഡോ.പി അബ്ദു, സഈദ് അസ്‌ലം, കൗണ്‍സിലര്‍ കെ.ടി റുഖിയ, റോയ്, നീരജ്, പ്രൊഫ. മുഹമ്മദ് അഷ്‌റഫ്, മുഹമ്മദ് ഷരീഫ് ഹുദവി, നിസാര്‍, മുഹമ്മദ് സ്വാലിഹ് സംബന്ധിച്ചു.