പാലക്കാട്: ജില്ലയിലെ എം.എല്‍.എമാരും ജില്ലാ കലക്ടറും നടത്തി വരുന്ന പരാതി പരിഹാര അദാലത്തിലേയ്ക്കുളള അപേക്ഷകള്‍ അക്ഷയ സെന്ററുകളിലും സ്വീകരിക്കുമെന്ന് ജില്ലാ കലക്ടര്‍ അറിയിച്ചു. അതാത് താലൂക്ക് ഓഫിസ്, വില്ലേജ് ഓഫിസുകള്‍, ഐ.ടി.ഡി.പി ട്രൈബല്‍ ഡെവലപ്പ്‌മെന്റ് ഓഫിസുകളിലും പരാതി സ്വീകരിക്കും.
ആലത്തൂര്‍ എം.എല്‍.എ കെ.ഡി പ്രസേനന്റെ നേതൃത്വത്തില്‍ കിഴക്കഞ്ചേരി പഞ്ചായത്തിലെ ഒന്‍പതാം വാര്‍ഡില്‍ അമ്പിട്ടന്‍ തരിശ് പട്ടികവര്‍ഗ കോളനിയില്‍ ഫെബ്രുവരി 13നും മണ്ണാര്‍ക്കാട് എം.എല്‍.എ എന്‍. ഷംസുദ്ദീന്റെ അധ്യക്ഷതയില്‍ ഫെബ്രുവരി 16ന് അഗളി ഭൂതവഴി ഊരിലും ചിറ്റൂര്‍ എം.എല്‍.എ കെ. കൃഷ്ണന്‍ കുട്ടിയുടെ അധ്യക്ഷതയില്‍ പെരുമാട്ടി പഞ്ചായത്തിലെ പ്ലാച്ചിമട പട്ടികവര്‍ഗാംഗങ്ങളുടെ കോളനിയില്‍ ഫെബ്രുവരി 17നുമാണ് പരാതി പരിഹാര അദാലത്ത് നടക്കുന്നത്.