റിയാദ്: ഭീകരപ്രവര്‍ത്തനത്തിന് ശിക്ഷിക്കപ്പെട്ട യുവാവിന് ജയിലില്‍ മാംഗല്യം. സഊദി അറേബ്യയിലെ ഭീകരവാദജയിലാണ് വേറിട്ട വിവാഹത്തിനു വേദിയായത്. വിവാഹം നടത്തിക്കൊടുത്തത് ദേശീയ സുരക്ഷാ സമിതി ഉദ്യോഗസ്ഥരും ജയില്‍ അധികൃതരും. സാക്ഷിയായാകാന്‍ സമൂഹത്തിലെ വ്യത്യസ്ത മേഖലയിലെ നിരവധി പേര്‍.
ഭീകരാക്രമണങ്ങള്‍ക്കു പേരുകേട്ട രാജ്യത്തെ കിഴക്കന്‍ പ്രവിശ്യയിലെ ഖതീഫ് ഭീകര ജയിലിലാണു വിവാഹം അരങ്ങേറിയത്. ഭീകരവാദിയായി മുദ്ര കുത്തപ്പെട്ട ഒരാള്‍ക്കു ജീവിതം നല്‍കാന്‍ സന്നദ്ധയായ യുവതിയും അതിന് അനുവാദം കൊടുത്ത അധികൃതരും ഇപ്പോള്‍ സമൂഹമാധ്യമങ്ങളില്‍ താരങ്ങളായി മാറിയിരിക്കുകയാണ്. ഭീകരരെ താമസിപ്പിച്ച ജനറല്‍ ഇന്‍വെസ്റ്റിഗേഷന്‍ ഡിപ്പാര്‍ട്ട്‌മെന്റ് ജയിലില്‍ കഴിഞ്ഞ ദിവസമായിരുന്നു ചടങ്ങ് നടന്നത്. ജയിലിലെ എല്ലാ വിഭാഗങ്ങളും ചുറ്റിനടന്നു കാണിച്ച ശേഷമാണ് അതിഥികളെ വിവാഹവേദിയായ സ്‌പോര്‍ട്‌സ് സെന്ററിലേയ്ക്ക് ആനയിച്ചത്. മണവാളനു ദേശീയ സുരക്ഷാ ഏജന്‍സി 10,000 റിയാല്‍ സമ്മാനവും നല്‍കി. വധൂവരന്മാര്‍ക്കും വനിതകള്‍ക്കുമായി വിസിറ്റേഴ്‌സ് കെട്ടിടത്തില്‍ പ്രത്യേകം ഹാളുകളും സജ്ജമാക്കിയിരുന്നു.
വധൂവരന്മാരുടെ മാതാപിതാക്കള്‍, സഹോദരിമാര്‍ എന്നിവരുടെ ആശീര്‍വാദത്തോടെയാണു ചടങ്ങുകള്‍ ആരംഭിച്ചിച്ചത്. തുടര്‍ന്ന് പാരമ്പര്യ ആചാരപ്രകാരം വധുവിനെ സ്വീകരിക്കുകയും സന്തോഷം പങ്കുവയ്ക്കുകയും ചെയ്തു.
വിവാഹം പൂര്‍ത്തിയായ ശേഷം നവദമ്പതികള്‍ക്കായി ആദ്യ രാത്രി ചെലവഴിക്കുന്നതിന് ഇതേ കെട്ടിടത്തില്‍ പ്രത്യേക മുറി തന്നെ ഒരുക്കിയിരുന്നു. ഇവരുടെ ബന്ധുക്കളും യുവാവിന്റെ ഗ്രാമത്തിലെ പൗരപ്രമുഖരും മാധ്യമപ്രവര്‍ത്തകര്‍, ദേശീയ മനുഷ്യാവകാശ കമ്മിഷന്‍, പബ്ലിക് പ്രോസിക്യൂഷന്‍ പ്രതിനിധികള്‍, സുരക്ഷാ വകുപ്പ് മേധാവികള്‍, കിഴക്കന്‍ പ്രവിശ്യയിലെ സര്‍ക്കാര്‍ വകുപ്പ് മേധാവികള്‍ തുടങ്ങിയവര്‍ വിവാഹത്തില്‍ പങ്കെടുത്തു.