സിഡ്‌നി: ആഷസ് ടെസ്റ്റ് പരമ്പര അടിയറവ് വച്ചതിന്റെ ക്ഷീണം ഇംഗ്ലണ്ട് തീര്‍ത്തു. ആസ്‌ത്രേലിയക്കെതിരായ ഏകദിന പരമ്പരയില്‍ തുടര്‍ച്ചയായ മൂന്നാം വിജയം സ്വന്തമാക്കി അവര്‍ പരമ്പര പിടിച്ചെടുത്തു. അഞ്ച് മത്സരങ്ങളടങ്ങിയ പരമ്പര 3-0ത്തിനാണ് ഇംഗ്ലണ്ട് നേടിയത്. മൂന്നാം പോരാട്ടത്തില്‍ 16 റണ്‍സിനാണ് ഇംഗ്ലണ്ട് വിജയിച്ചത്.
ആദ്യം ബാറ്റ് ചെയ്ത ഇംഗ്ലണ്ട് നിശ്ചിത 50 ഓവറില്‍ ആറ് വിക്കറ്റ് നഷ്ടത്തില്‍ 302 റണ്‍സെന്ന മികച്ച സ്‌കോര്‍ പടുത്തുയര്‍ത്തി. വിജയം തേടിയിറങ്ങിയ ആസ്‌ത്രേലിയയുടെ പോരാട്ടം 50 ഓവറില്‍ ആറ് വിക്കറ്റ് നഷ്ടത്തില്‍ 286 റണ്‍സില്‍ അവസാനിപ്പിച്ചാണ് ഇംഗ്ലണ്ടിന്റെ ജയം.
മികച്ച ഫോമില്‍ നില്‍ക്കുന്ന ആരോണ്‍ ഫിഞ്ച് ഒരിക്കല്‍ കൂടി ടീമിന്റെ ടോപ് സ്‌കോററായി. ഫിഞ്ച് 62 റണ്‍സെടുത്തു. തുടക്കത്തില്‍ രണ്ട് വിക്കറ്റ് നഷ്ടമായി ആസ്‌ത്രേലിയ പരുങ്ങിയെങ്കിലും പിന്നീടെത്തിയവര്‍ മികച്ച രീതിയില്‍ ബാറ്റേന്തി. എന്നാല്‍ ആര്‍ക്കും അന്തിമ വിജയത്തിലേക്ക് ടീമിനെ നയിക്കാന്‍ സാധിക്കാതെയും വന്നു.
വിക്കറ്റുകള്‍ വീഴ്ത്തിയില്ലെങ്കിലും ഇംഗ്ലീഷ് ബൗളര്‍മാര്‍ കണിശമായി പന്തെറിഞ്ഞ് ഓസീസ് ബാറ്റ്‌സ്മാന്‍മാരെ കുഴക്കിയത് മത്സരത്തില്‍ നിര്‍ണായകമായി. മാര്‍ക് സ്റ്റോയിനിസ് (56), മിച്ചല്‍ മാര്‍ഷ് (55), ക്യാപ്റ്റന്‍ സ്റ്റീവന്‍ സ്മിത്ത് (45), ടിം പെയ്ന്‍ (പുറത്താകാതെ 31) എന്നിവര്‍ പൊരുതി. ഇംഗ്ലണ്ടിനായി മാര്‍ക് വുഡ്, ക്രിസ് വോക്‌സ്, ആദില്‍ റഷീദ് എന്നിവര്‍ രണ്ട് വീതം വിക്കറ്റുകള്‍ വീഴ്ത്തി.
ടോസ് നേടി ആസ്‌ത്രേലിയ ഇംഗ്ലണ്ടിനെ ബാറ്റിങിന് വിടുകയായിരുന്നു. കളിയുടെ തുടക്കത്തില്‍ ഇംഗ്ലീഷ് ബാറ്റിങ് നിര റണ്‍സെടുക്കാന്‍ ബുദ്ധിമുട്ടി. എന്നാല്‍ മധ്യനിരയില്‍ ബാറ്റിങിനിറങ്ങിയ വിക്കറ്റ് കീപ്പര്‍ ബാറ്റ്‌സ്മാന്‍ ജോസ് ബട്‌ലറുടെ അഞ്ചാം ഏകദിന സെഞ്ച്വറി ഇംഗ്ലണ്ടിന് കരുത്തായി മാറി. എട്ടാമനായി ക്രീസിലെത്തിയ ക്രിസ് വോക്‌സ് അര്‍ധ സെഞ്ച്വറിയുമായി ബട്‌ലറെ പന്തുണച്ചതോടെയാണ് ഇംഗ്ലണ്ട് മികച്ച സ്‌കോറിലേക്ക് കുതിച്ചത്.
ഇരുവരും ചേര്‍ന്ന് പിരിയാത്ത ഏഴാം വിക്കറ്റില്‍ കൂട്ടിച്ചേര്‍ത്ത 113 റണ്‍സാണ് ഇംഗ്ലണ്ടിന്റെ സ്‌കോര്‍ 300 കടത്തിയത്. ഇരുവരും വമ്പന്‍ അടികളിലൂടെ റണ്‍ റേറ്റ് ഉയര്‍ത്തി. ബട്‌ലര്‍ 83 പന്തില്‍ ആറ് ഫോറും നാല് സിക്‌സും സഹിതം 100 റണ്‍സുമായി പുറത്താകാതെ നിന്നു. വോക്‌സ് പുറത്താകാതെ 36 പന്തില്‍ 53 റണ്‍സാണ് സ്വന്തമാക്കിയത്. അഞ്ച് ഫോറും രണ്ട് സിക്‌സും സഹിതമാണ് താരം മൂന്നാം ഏകദിന അര്‍ധ സെഞ്ച്വറി നേടിയത്. ക്യാപ്റ്റന്‍ ഇയാന്‍ മോര്‍ഗന്‍ (41), ഓപണര്‍ ബെയര്‍‌സ്റ്റോ (39) എന്നിവരും മികച്ച സംഭാവന നല്‍കി. ഓസീസിനായി ഹാസ്‌ലെവുഡ് രണ്ട് വിക്കറ്റുകള്‍ വീഴ്ത്തി. ബട്‌ലറാണ് കളിയിലെ കേമന്‍.