തിരുവനന്തപുരം: റീസര്‍വേ നടപടികള്‍ സ്വകാര്യവല്‍ക്കരിക്കുമെന്ന് നയപ്രഖ്യാപന പ്രസംഗത്തില്‍ ഗവര്‍ണര്‍. സര്‍വേ വകുപ്പിലെ സി.പി.ഐ സംഘടനയുടെ നിലപാടിന് എതിരാണിത്. ഭൂമിയുടെ പ്രാധാന്യം കണക്കിലെടുത്ത് സംസ്ഥാനത്തെ 1,664 വില്ലേജുകളിലും യോഗ്യരായ ഏജന്‍സികളെകൊണ്ട് റീസര്‍വേ പൂര്‍ത്തിയാക്കുമെന്നാണ് നയപ്രഖ്യാപന പ്രസംഗത്തിലുള്ളത്.
സര്‍വേ വകുപ്പില്‍ സ്വകാര്യവല്‍കരണം അനുവദിക്കരുതെന്നാണ് സി.പി.ഐ യൂനിയന്റെ നിലപാട്. കഴിഞ്ഞ ദിവസം നടന്ന സംഘടനയുടെ സംസ്ഥാന സമ്മേളനത്തില്‍ ആവശ്യത്തിന് ജീവനക്കാരെ എംപ്ലോയ്‌മെന്റ് എക്‌സ്‌ചേഞ്ചില്‍നിന്ന് നിയമിച്ച് മൂന്നുവര്‍ഷത്തിനുള്ളില്‍ സര്‍വേ പൂര്‍ത്തിയാക്കുമെന്നായിരുന്നു റവന്യൂ മന്ത്രി ഇ. ചന്ദ്രശേഖരന്‍ ഉറപ്പുനല്‍കിയത്. സര്‍വേ സ്വകാര്യവല്‍ക്കരിക്കണമെന്ന നിലപാടാണ് ഡയറക്ടര്‍ ഗോപാലകൃഷ്ണനുള്ളത്. എങ്കില്‍ മാത്രമേ മൂന്നുവര്‍ഷംകൊണ്ട് സര്‍വേ പൂര്‍ത്തിയാക്കാന്‍ കഴിയൂവെന്നും അദ്ദേഹം പറഞ്ഞിരുന്നു. എന്നാല്‍, യൂനിയനുകളുടെ എതിര്‍പ്പിനെ തുടര്‍ന്ന് ഡയറക്ടര്‍ക്ക് മുന്നോട്ടുപോകാനായില്ല.