കീഴാറ്റൂര്‍: പൂന്താനം സാഹിത്യോത്സവത്തിന് കീഴാറ്റൂരില്‍ സര്‍ഗസംഗമത്തോടെ തുടക്കമായി. സര്‍ഗസംഗമം യു.കെ കുമാരന്‍ ഉദ്ഘാടനം ചെയ്തു. ജി.സി കാരക്കല്‍ അധ്യക്ഷനായി. പഞ്ചായത്ത് പ്രസിഡന്റ് പ്രസീദ മണിയാണി, അംഗങ്ങളായ സി.കെ രമാദേവി, ജമീല ചാലിയത്തൊടി, മണ്ഡകത്തില്‍ സുരേന്ദ്രന്‍, സമീറ ഹാരീസ്, എം. രാമദാസ്, പി. രതീഷ് സംസാരിച്ചു.
വിദ്യാര്‍ഥികള്‍ക്കായി  നടത്തിയ കഥ, കവിത രചന മത്സരത്തില്‍ 51 വിദ്യാര്‍ഥികള്‍ പങ്കെടുത്തു. ഇന്നു രാവിലെ 10ന് നടക്കുന്ന നാടക വിചാര സദസ് കേരള സംഗീത അക്കാദമി അംഗം ശ്രീജ ആറങ്ങോട്ടുകര ഉദ്ഘാടനം ചെയ്യും. വൈകിട്ട് 4.30ന് സാഹിത്യോത്സവ ഉദ്ഘാടനവും പൂന്താനം സ്മാരിക ഓഡിറ്റോറിയ സമര്‍പ്പണവും മന്ത്രി കടകംപള്ളി സുരേന്ദ്രന്‍ നിര്‍വഹിക്കും. അഡ്വ. എം. ഉമ്മര്‍ എം.എല്‍.എ അധ്യക്ഷനാകും. ചടങ്ങില്‍ സമഗ്ര സംഭാവനയ്ക്കുള്ള പൂന്താനം സാഹിത്യ പുരസ്‌കാരം ടി. പത്മനാഭന് സമര്‍പ്പിക്കും. അവാര്‍ഡ് പ്രഖ്യാപനം പി. അബ്ദുല്‍ ഹമീദ് എം.എല്‍.എ നിര്‍വഹിക്കും.
സാഹിത്യോത്സവ സപ്ലിമെന്റ്  പ്രകാശനം ജില്ലാ കലക്ടര്‍ അമിത് മീണയും പുസ്തകോത്സവ ഉദ്ഘാടനം പി.കെ പാറക്കടവും നിര്‍വഹിക്കും. കേരള സംഗീത നാടക അക്കാദമി സെക്രട്ടറി പൂന്താനം സ്മാരക പ്രഭാഷണം നടത്തും. വൈകിട്ട് ഏഴിനു കേരള സംഗീത അക്കാദമിയുടെ മത്സ്യഗന്ധി നാടകം, ഘനസംഘം  നൃത്താവിഷ്‌കാരം എന്നിവയും രാത്രി എട്ടിനു കേരള കലാമണ്ഡലത്തിന്റെ നൃത്തനൃത്യങ്ങള്‍ എന്നിവയും നടക്കും. സാഹിത്യോത്സവം നാളെ സമാപിക്കും.