കാഞ്ഞങ്ങാട് : നഗരത്തിലെ  ഇന്ത്യന്‍ കോഫി ഹൗസിന് നേരെ അക്രമം നടത്തിയ സംഭവത്തില്‍ പൊലിസ് കേസെടുത്തു. കുപ്രസിദ്ധ കവര്‍ച്ചകാരന്‍ കാരാട്ട് നൗഷാദിനും കൂട്ടാളിക്കുമെതിരെയാണ്  ഹൊസ്ദുര്‍ഗ് പൊലിസ് കേസെടുത്തത്.
കഴിഞ്ഞ ദിവസം രാത്രിയാണ്  കോഫി ഹൗസിന് നേരെ ഇവര്‍ അക്രമം നടത്തിയത്.ഇതേ തുടര്‍ന്ന് സ്ഥാപനത്തിന്റെ   ജനല്‍ച്ചില്ലുകള്‍ തകര്‍ന്നിരുന്നു.
     ഇതിനു മുന്‍പ്   കോഫി ഹൗസ് പരിസരത്ത് രണ്ട് സംഘങ്ങള്‍ ചേരിതിരിഞ്ഞ് സംഘട്ടനത്തിലേര്‍പ്പെടുകയും ഇത്  സംഘര്‍ഷത്തിന് സാധ്യത ഉണ്ടാക്കുകയും ചെയ്തിരുന്നു. കഞ്ചാവ് വില്‍പ്പനക്കാര്‍ തമ്മിലുണ്ടായ വാക്ക് തര്‍ക്കമാണ് സംഘട്ടനത്തില്‍ കലാശിച്ചത്.
വിവരമറിഞ്ഞ് പൊലിസ് സ്ഥലത്തെത്തിയതോടെ  സംഘം സ്ഥലം വിടുകയും ചെയ്തിരുന്നു.സംഘട്ടനം നടക്കുന്ന വിവരം പൊലിസിനു നല്‍കിയത്
 കോഫി ഹൗസ് ജീവനക്കാരാണെന്നാരോപിച്ചായിരുന്നു സ്ഥാപനത്തിന് നേരെ ആക്രമണം നടത്തിയതെന്ന് പറയുന്നു.
   പൊലിസ്  അന്വേഷണത്തില്‍  കാരാട്ട് നൗഷാദും കൂട്ടാളിയുമാണ് ആക്രമണം നടത്തിയതെന്ന് കണ്ടെത്തുകയായിരുന്നു.കവര്‍ച്ച, വധശ്രമം, ആസിഡാക്രമണം തുടങ്ങി ഒട്ടനവധി കേസുകളില്‍ പ്രതിയായ   നൗഷാദ് ഒരുകേസില്‍ റിമാന്‍ഡില്‍ കഴിയുകയായിരുന്നു.അടുത്തിടെയാണ്  ഇയാള്‍ ജാമ്യത്തിലിറങ്ങിയത്.