മംഗളൂരു: സിറ്റി പൊലിസ് രണ്ടു പേരെ ഗുണ്ടാ നിയമപ്രകാരം അറസ്റ്റു ചെയ്തു. അണ്ണാനഗര്‍ സ്വദേശി രോഹിദാസ് എന്ന ആകാശ് ഭവന്‍ ശരണ്‍ (32), കസബാ ബെഗരേ സ്വദേശി റഹീം എന്ന ചാപ്പ താന്നി റഹീം (37) എന്നിവരേയാണ് കഴിഞ്ഞ ദിവസം വ്യത്യസ്ത സ്റ്റേഷനുകളില്‍ നിന്നും പിടികൂടിയതെന്നു സിറ്റി പൊലിസ് കമ്മിഷണര്‍ അറിയിച്ചു. 2015 ലെ യൂസുഫ് കൊലപാതകം, പ്രശാന്ത് ഷെട്ടി കൊലപാതകം എന്നീ കേസുകളടക്കം 17 ഓളം ക്രിമിനല്‍ കേസുകളില്‍ പ്രതിയായ ശരണിനെ കവൂര്‍ എസ്.ഐ എം.എ നടരാജന്റെ നേതൃത്വത്തിലുള്ള പൊലിസ് സംഘമാണ് പിടികൂടിയത്. പനമ്പൂര്‍ എസ്.ഐ എ.സി ലോകേഷ് കുമാറിന്റെ നേതൃത്വത്തില്‍ അറസ്റ്റു ചെയ്ത റഹീം കഞ്ചാവ് വിതരണമുള്‍പ്പടെ എട്ടോളം കേസില്‍ പ്രതിയാണെന്നും പൊലിസ് അറിയിച്ചു.