ന്യൂഡല്‍ഹി: രാജ്യത്ത് വന്‍തോതില്‍ തൊഴിലവസരങ്ങള്‍ സൃഷ്ടിച്ചിട്ടുണ്ടെന്ന കേന്ദ്ര സര്‍ക്കാരിന്റെ അവകാശ വാദത്തെ പരിഹസിച്ച് കോണ്‍ഗ്രസ് നേതാവും മുന്‍ധനകാര്യ മന്ത്രിയുമായ പി. ചിദംബരം. പക്കോട വില്‍ക്കുന്നത് ജോലിയായി കണക്കാക്കിയാല്‍ ഭിക്ഷയെടുക്കുന്നതിനെയും ജോലിയായി കണക്കാക്കികൂടെയെന്നാണ് ചിദംബരം പരിഹസിച്ചത്.
കഴിഞ്ഞ 19ന് ഒരു ചാനലിന് നല്‍കിയ അഭിമുഖത്തില്‍ നടത്തിയ പരാമര്‍ശത്തെ പരിഹസിച്ചാണ് ചിദംബരം രംഗത്തുവന്നത്. പക്കോട വിറ്റ് ഒരാള്‍ പ്രതിദിനം 200 രൂപ വീതം സമ്പാദിക്കുന്നുണ്ടെങ്കില്‍ അയാളെ ജോലിയുള്ള ആളായിട്ടല്ലേ പരിഗണിക്കുകയെന്ന് മോദി ചോദിച്ചിരുന്നു. ഇതിനെയാണ് ചിദംബരം ചോദ്യം ചെയ്തത്. പക്കോട വില്‍ക്കുന്നത് ജോലിയാണെങ്കില്‍ ഭിക്ഷയെടുക്കുന്നതും ജോലിയാകില്ലേ.
ഭിക്ഷയെടുക്കാന്‍ നിര്‍ബന്ധിതരായ ദരിദ്രരേയും അംഗവൈകല്യമുള്ളവരേയും ഇനി ജോലിയുള്ളവരായി കണക്കാക്കാമെന്നും ചിദംബരം ട്വീറ്റ് ചെയ്തു.
ജോലിയും സ്വയം തൊഴിലും തമ്മിലുള്ള വ്യത്യാസം മനസിലാക്കണമെന്ന് ചിദംബരം മോദിയെ ഓര്‍മിപ്പിക്കുന്നു. ഒരു സ്ഥാപനത്തില്‍ നിന്ന് സുരക്ഷിതവും സ്ഥിരവുമായ വരുമാനം ലഭിക്കുന്നതിനെയാണ് ജോലിയെന്നതുകൊണ്ട് ഉദ്ദേശിക്കുന്നത്. എന്നാല്‍ സ്വയം തൊഴിലിന് ഈ സുരക്ഷിതത്വം ഇല്ല. ദേശീയ ഗ്രാമീണ തൊഴിലുറപ്പ് പദ്ധതിയിലുള്ള തൊഴിലാളികളെയും ജോലിയുള്ളവരായിട്ടാണോ കണക്കാക്കിയിരിക്കുന്നതെന്നും ചിദംബരം ചോദിക്കുന്നു.