ചേളാരി: മൈലാഞ്ചിച്ചോപ്പണിഞ്ഞ കുഞ്ഞിളംകൈകളുടെ ഒപ്പന മുട്ടും ഇശലുകളുടെ ഈണങ്ങളുമായി വെളിമുക്ക് ക്രസന്റ് റസിഡന്‍ഷ്യല്‍ സ്‌കൂളില്‍ അസ്മി സംസ്ഥാന കലോത്സവം സമാപിച്ചു. സംസ്ഥാനത്തെ വിവിധ ജില്ലകളില്‍ നിന്നുമായി 1000 ത്തില്‍ പരം കലാപ്രതിഭകള്‍ മത്സരത്തില്‍ മാറ്റുരച്ചു. 117 പോയന്റ് നേടി വെളിമുക്ക് ക്രസന്റ് റസിഡന്‍ഷ്യല്‍ സ്‌കൂള്‍ ഒന്നാം സ്ഥാനവും 104 പോയന്റ് നേടി ചെമ്മാട് നാഷനല്‍ ഇംഗ്ലീഷ് മീഡിയം ഹയര്‍ സെക്കന്‍ഡി സ്‌കൂള്‍ രണ്ടാം സ്ഥാനവും 97 പോയന്റ് നേടി ദാറുല്‍ ഹിദായ ഹയര്‍ സെക്കന്‍ഡറി സ്‌കൂള്‍ മൂന്നാം സ്ഥാനവും നേടി.
പള്ളിക്കല്‍ ബസാര്‍ അല്‍ ബയാന്‍ പബ്ലിക് സ്‌കൂളിലെ കെ.മുഹമ്മദ് സവാദിനെ കലാ പ്രതിഭയായും ഒതുക്കുങ്ങല്‍ ദഅവത്ത് ഇംഗ്ലീഷ് മീഡിയം സ്‌കൂളിലെ പി.ഫാത്തിമ്മ ഹലയെ കലാ തിലകമായും തെരഞ്ഞെടുത്തു. സമാപന പരിപാടി പി.അബ്ദുല്‍ ഹമീദ് എം.എല്‍.എ ഉദ്ഘാടനം ചെയ്തു. സ്വാഗത സംഘം ചെയര്‍മാന്‍ എം.എ ഖാദര്‍ അധ്യക്ഷനായി. ദര്‍ശ ടി.വി മാനേജിങ് ഡയറക്ടര്‍ ഇസ്മാഈല്‍ കുഞ്ഞി ഹാജി സമ്മാന വിതരണം നടത്തി. ഷാഹുല്‍ ഹമീദ് മാസ്റ്റര്‍ മേല്‍മുറി ജേതാക്കളെ പ്രഖ്യാപിച്ചു. അസ്മി സംസ്ഥാന ജന.സെക്രട്ടി ഹാജി പി.കെ മുഹമ്മദ്, സിദ്ദീഖ് ഫൈസി വാളക്കുളം, കെ.കെ.എസ് തങ്ങള്‍ വെട്ടിച്ചിറ, പി .വി മുഹമ്മദ് മൗലവി എടപ്പാള്‍, റഹീം ചുഴലി, ഒ.കെ.എം കുട്ടി ഉമരി, അഡ്വ.പി.പി ആരിഫ്, അഡ്വ.നാസര്‍ കാളമ്പാറ,സലീം എടക്കര, അനീസ് ജിഫ്‌രി തങ്ങള്‍ , ഡോ. അലി അക്ബര്‍ ഹുദവി, സി.പി ഷിയാസ് ഹുദവി,എ.മുഹമ്മദലി സംസാരിച്ചു. അസ്മി സംസ്ഥാന സെക്രട്ടറി നവാസ് ഓമശ്ശേരി സ്വാഗതവും സ്വാഗത സംഘം കണ്‍വീനര്‍ സി രാജ് മോഹനന്‍ നന്ദിയും പറഞ്ഞു.