സുല്‍ത്താന്‍ ബത്തേരി: കാട്ടാനയുടെ ആക്രമണത്തില്‍ ഒരു മാസത്തിനിടെ ജില്ലയില്‍ കൊല്ലപ്പെടുന്നത് രണ്ടു പേര്‍.
ഈ വര്‍ഷമാദ്യം പള്ളിവയല്‍ മണലിമൂല കോളനിയിലെ രാജനാണ് കാട്ടാനയുടെ ആക്രമണത്തില്‍ ആദ്യം കൊല്ലപ്പെട്ടത്.
തുടര്‍ന്ന് ഇന്ന് താളൂരില്‍ തോട്ടം തൊഴിലാളി തുട്ട്‌രാജ് ഷെട്ടി കൊല്ലപ്പെട്ടതാണ് രണ്ടാമത്തെ സംഭവം. ഇതിനുപുറമെ രണ്ട് പേര്‍ക്ക് പരുക്കേല്‍ക്കുകയും ചെയ്തു. പുതുവര്‍ഷം പിറന്ന് ഒരുമാസത്തിനിടെ രണ്ടാമത്തെ വ്യക്തിയാണ് കാട്ടാനയുടെ ആക്രമണത്തില്‍ കൊല്ലപ്പെടുന്നത്.
ജോലി കഴിഞ്ഞ് വീട്ടിലേക്ക് മടങ്ങുന്നതിന്നിടെയാണ് രാജന് നേരെ കാട്ടാനയുടെ ആക്രമണം ഉണ്ടായത്. കഴിഞ്ഞ ദിവസം വടക്കനാട് സ്വദേശി ജോണിന് കാട്ടാനയുടെ ആക്രമണത്തില്‍ പരുക്കേറ്റിരുന്നു.
തുടര്‍ച്ചയായി കാട്ടാന ജനവാസ കേന്ദ്രത്തില്‍ ഇറങ്ങി മനുഷ്യര്‍ക്ക്‌നേരെ ആക്രമണം നടത്തുന്നത് ജനരോഷത്തിന് കാരണമായിട്ടുണ്ട്. അധികൃതരുടെ ഭാഗത്ത് നിന്ന് നടപടിവേണമെന്നാണ് ആവശ്യം ഉയരുന്നത്.