റിയാദ്: യമനിലെ ഔദ്യോഗിക സര്‍ക്കാരിന് വേണ്ടി യുദ്ധത്തിലേര്‍പ്പെട്ട അറബ് സഖ്യ സേനയുടെ വ്യോമാക്രമണത്തില്‍ വിമത വിഭാഗമായ ഹൂതികളെ സഹായിക്കുന്ന ഇറാന്റെ സൈനികര്‍ കൊല്ലപ്പെട്ടു. ഉത്തര സഅദയില്‍ ഹൂതികളുടെ കേന്ദ്രങ്ങള്‍ക്ക് നേരെ സഖ്യ സേന നടത്തിയ വ്യോമാക്രമണത്തിലാണ് ഇറാന്‍ റവല്യൂഷനറി ഗാര്‍ഡ് സൈനികര്‍ ഉള്‍പ്പെടെ നിരവധി ഹൂതികള്‍ കൊല്ലപ്പെട്ടത്. ആക്രമണത്തില്‍ ഇറാന്‍ റവല്യൂഷനറി ഗാര്‍ഡിനു കീഴിലെ അഞ്ചു വിദഗ്ധര്‍ കൊല്ലപ്പെട്ടതായി സ്ഥിരീകരിച്ചിട്ടുണ്ട്.

സഅദയിലെ സാഖീനില്‍ ഹൂതികളുടെ ക്യാംപിനു നേരെയാണ് സഖ്യ സേന ആക്രമണം നടത്തിയത്. സാഖീന്‍ ക്യാംപില്‍ നിന്നും കടത്താന്‍ ശ്രമിച്ച ബാലിസ്റ്റിക് മിസൈല്‍ ലോഞ്ചറുകളും ക്യാംപിലെ ആയുധ പുരകളും സഖ്യ സേന ബോംബിട്ടു തകര്‍ത്തിട്ടുണ്ട്. കൂടാതെ സഅദക്കു സമീപമുള്ള ഖതാഫ് ജില്ലയിലും ഹൈദാന്‍ ജില്ലയില്‍ ദുവൈബിലും ഹൂതികളുടെ കേന്ദ്രങ്ങള്‍ക്കു നേരെ സഖ്യ സേന ആക്രമണങ്ങള്‍ നടത്തി.