മലപ്പുറം: മുന്‍ കേന്ദ്രമന്ത്രിയും എം.പിയുമായിരുന്ന ഇ അഹമ്മദിന്റെ സ്മരണയില്‍ മലപ്പുറം മുനിസിപ്പാലിറ്റിയിലെ 36ാം വാര്‍ഡ് പാണക്കാട് കാരപറമ്പില്‍ റോഡ് തുറന്നു. മുസ്‌ലിം ലീഗ് ജില്ലാ പ്രസിഡന്റ് പാണക്കാട് സയ്യദ് സാദിഖലി ശിഹാബ് തങ്ങളും ഇ അഹമ്മദിന്റെ മകന്‍ റയീസ് അഹമ്മദും ചേര്‍ന്ന് റോഡ് ഉദ്ഘാടനം നിര്‍വഹിച്ചു.
ഹാജിയാര്‍പള്ളി എടായ്പാലം റോഡില്‍ നിന്നു മേസ്തിരിക്കുന്ന് വഴി പാണക്കാട് കുന്നുമ്മല്‍ മദ്‌റസ റോഡ് വഴി സ്പിന്നിങ് മില്‍ റോഡിലേക്കെത്തുന്ന പുതിയ റോഡാണ് ഉദ്ഘാടനം ചെയ്തത്. മലപ്പുറം നഗരസഭക്ക് കഴിഞ്ഞ സര്‍ക്കാര്‍ അനുവദിച്ച 44 ലക്ഷം രൂപയാണ് ഇതിനായി ചെലവഴിച്ചത്. 500 മീറ്ററില്‍ അധികം ദൂരമുണ്ട്.
വാര്‍ഡ് കൗണ്‍സിലര്‍ അഡ്വ. റിനീഷ റഫീഖ് ചടങ്ങില്‍ അധ്യക്ഷയായി. നഗരസഭ സ്ഥിരസമിതി അധ്യക്ഷന്‍ പരി മജീദ്, ഇ അഹമ്മദിന്റെ പഴ്‌സണല്‍ സെക്രട്ടറിയായിരുന്ന ഷഫീഖ്, രായിന്‍ കടമ്പോട്ട്, എം.കെ ഹുസൈന്‍, മാനു മാസ്റ്റര്‍, ഫാസിര്‍ അറബി, ഷാഫി മൂഴിക്കല്‍, അഷ്‌റഫ് കോപ്പിലാക്കല്‍, സി.പി മജീദ്, ഹബീബ് തങ്ങള്‍, വി.ടി മുനീര്‍, മുസ്തഫ, അഫ്‌സല്‍ മൂഴിക്കല്‍, ഇര്‍ഷാദ് അറബി സംസാരിച്ചു.