സെഞ്ചൂറിയന്‍: റെക്കോര്‍ഡ് നേട്ടത്തോടെ അന്താരാഷ്ട്ര കരിയറിലെ ഏറ്റവും മികച്ച ബൗളിങ് പുറത്തെടുത്ത് യുസ്‌വേന്ദ്ര ചഹല്‍. ദക്ഷിണാഫ്രിക്കന്‍ മണ്ണില്‍ അഞ്ച് വിക്കറ്റെടുക്കുന്ന ആദ്യ ഇന്ത്യന്‍ സ്പിന്നറെന്ന റെക്കോര്‍ഡാണ് ചഹല്‍ സ്വന്തം പേരില്‍ കുറിച്ചത്. ഒപ്പം ദക്ഷിണാഫ്രിക്കന്‍ മണ്ണില്‍ ഏറ്റവും മികച്ച ബൗളിങ് പുറത്തെടുക്കുന്ന സ്പിന്നര്‍മാരില്‍ രണ്ടാം സ്ഥാനത്തെത്താനും ചഹലിന് സാധിച്ചു. നിക്കി ബോയെ ആസ്‌ത്രേലിയക്കെതിരേ പുറത്തെടുത്ത 21ന് അഞ്ച് വിക്കറ്റ് വീഴ്ത്തിയ പ്രകടനമാണ് ഒന്നാം സ്ഥാനത്ത്. ദക്ഷിണാഫ്രിക്കക്കെതിരേ ഒരു ഇന്ത്യന്‍ സ്പിന്നറുടെ മികച്ച രണ്ടാമത്തെ പ്രകടനമായും ഇത് മാറി. നെയ്‌റോബിയില്‍ വച്ച് സുനില്‍ ജോഷി ആറ് റണ്‍സ് വഴങ്ങി അഞ്ച് വിക്കറ്റ് വീഴ്ത്തിയതാണ് ഒന്നാമത്.
2001ല്‍ ഹര്‍ഭജന്‍ സിങ് 27 റണ്‍സ് വഴങ്ങി മൂന്ന് വിക്കറ്റെടുത്തതായിരുന്നു ഒരു ഇന്ത്യന്‍ സ്പിന്നറുടെ ദക്ഷിണാഫ്രിക്കന്‍ മണ്ണിലെ മികച്ച ബൗളിങ്. ചഹലിനൊപ്പം ദക്ഷിണാഫ്രിക്കയെ തകര്‍ക്കുന്നതില്‍ നിര്‍ണായക പങ്ക് വഹിച്ച കുല്‍ദീപ് യാദവും ഈ റെക്കോര്‍ഡ് മറികടന്നു. 20 റണ്‍സ് വഴങ്ങി മൂന്ന് വിക്കറ്റെടുത്താണ് കുല്‍ദീപ് ഹര്‍ഭജന്റെ നേട്ടം മറികടന്നത്. ഇരുവരും ചേര്‍ന്നുള്ള മാരക കൂട്ടുകെട്ട് ദക്ഷിണാഫ്രിക്കയെ സ്വന്തം മണ്ണില്‍ അവര്‍ നേടുന്ന ഏറ്റവും കുറഞ്ഞ ടോട്ടലെന്ന നാണക്കേടിലേക്കും തള്ളിയിട്ടു.