ദോഹ. മഴ കാരണം സമയ ക്രമം തെറ്റിയ ഖത്തര്‍ ടോട്ടല്‍ ഓപ്പണ് മത്സരത്തില്‍ പരാഗ്വെയുടെ മോണിക്ക പ്യുഗ്, സ്ലൊവാക്യയയുടെ ഡൊമിനിക സിബുലുകോവ, ചൈനയുടെ സാങ് ഷുവൈ എന്നിവര്‍ ക്വാര്‍ട്ടറിലെത്തി.

ഖലീഫ ടെന്നീസ് ആന്റ് സ്‌ക്വാഷ് കോംപ്ലക്‌സില്‍ മൂന്നാംദിനത്തിലും മത്സരങ്ങള്‍ക്ക് വില്ലനായി മഴയെത്തി. ഇന്നലെ രാവിലെയും ഉച്ചയ്ക്കുശേഷവുമായാണ് മത്സരങ്ങള്‍ നടന്നത്. സ്‌പെനിയിന്റെ ലോക ഏഴാം നമ്പര്‍താരവും ടൂര്‍ണമെന്റിലെ അഞ്ചാംസീഡുമായ ഗാര്‍ബിന്‍ മുഗുരൂസ പുറത്തായതാണ് ശ്രദ്ധേയ സംഭവം.

ചൈനയുടെ ലോക 31ാം നമ്പര്‍ താരം സാങ് ഷുവൈയാണ് സ്പാനിഷ് താരത്തെ അട്ടിമറിച്ചത്, സ്‌കോര്‍ 76, 36, 75. റഷ്യയുടെ അനസ്താസ്യ പവ്‌ല്യുചെങ്കോവയെ മൂന്നു സെറ്റ് നീണ്ട പോരാട്ടത്തില്‍ മറികടന്നാണ് സ്ലൊവാക്യയുടെ ലോക അഞ്ചാംനമ്പര്‍ താരം സിബുലുകോവ ക്വാര്‍ട്ടറില്‍ സ്ഥാനം ഉറപ്പിച്ചത്. ഡബിള്‍സില്‍ ടോപ്‌സീഡ് സ്വിറ്റ്‌സര്‍ലന്റിന്റെ മാര്‍ട്ടീന ഹിംഗിസ്‌ചൈനീസ് തായ്‌പേയിയുടെ യുങ് ജാന്‍ ചാന്‍ സഖ്യം ക്വാര്‍ട്ടറിലെത്തി.

ഹോളണ്ടിന്റെ കികി ബെര്‍ട്ടന്‍സ് സ്വീഡന്റെ യോഹന്ന ലാര്‍സണ്‍ സഖ്യത്തെ നേരിട്ടുള്ള സെറ്റുകള്‍ക്കാണ് പരാജയപ്പെടുത്തിയത്. ഇന്നലെ രാവിലെ പത്ത് ഒന്നാം റൗണ്ട് സിംഗിള്‍സ് മത്സരങ്ങളാണ് ഖലീഫ കോംപ്ലക്‌സില്‍ നടന്നത്. ഉച്ചയ്ക്കുശേഷമുള്ള രണ്ടാം റൗണ്ട് മത്സരങ്ങള്‍ പുരോഗമിക്കവെയാണ് മഴയെത്തിയതും കളി തടസപ്പെട്ടതും.