തായ്‌പെയ്: തായ്‌വാനിലെ ഹുവാലിനിലുണ്ടായ ഭൂചലനത്തില്‍ മരിച്ചവരുടെ എണ്ണം ആറായി. 200ലധികം പേര്‍ക്ക് പരുക്കേറ്റു. റിക്ടര്‍ സ്‌കെയിലില്‍ 6.4 തീവ്രത രേഖപ്പെടുത്തിയ ഭൂചലനത്തില്‍ നിരവധി പേരെ കാണാതായിട്ടുണ്ട്. 800 പേര്‍ ദുരിതാശ്വാസ കേന്ദ്രങ്ങളിലാണ്. ഹുവാനിലില്‍ നിന്ന് 22 കിലോമീറ്റര്‍ അകലെയാണ് പ്രഭവകേന്ദ്രം. പ്രാദേശിക സമയം രാത്രി 11.50 ഓടെയാണ് ഭൂചലനമുണ്ടായത്.
സംഭവത്തെ തുടര്‍ന്ന് രണ്ടായിരത്തോളം വീടുകളില്‍ വൈദ്യുതിബന്ധം തകരാറിലായി. ആശുപത്രികളുള്‍പ്പെടെ മിക്ക കെട്ടിടങ്ങളും ചരിഞ്ഞ് നിലംപതിക്കാറായ അവസ്ഥയിലാണ്. ഇവയില്‍ നിന്ന് സാഹസികമായാണ് ആളുകളെ രക്ഷപ്പെടുത്തുന്നത്. നിരവധിപേര്‍ ഇപ്പോഴും കെട്ടിടങ്ങള്‍ക്കുള്ളില്‍ കുടുങ്ങിക്കിടക്കുന്നുണ്ടെന്നാണ് വിവരം. ഒരു കെട്ടിടത്തില്‍ മാത്രം 140 പേര്‍ കുടുങ്ങിക്കിടക്കുന്നുണ്ടെന്ന് പറയപ്പെടുന്നു. ഹുവാലിനിലെ ആഡംബര ഹോട്ടലായ മാര്‍ഷലിനും മറ്റൊരു അപ്പാര്‍ട്ട്‌മെന്റിനുമാണ് കൂടുതല്‍ കേടുപാടുകള്‍ സംഭവിച്ചത്.
പ്രദേശത്തെ വലിയ ഹോട്ടല്‍ പൂര്‍ണമായും നിലംപൊത്തി. റോഡുകള്‍ ഭാഗികമായി തകര്‍ന്ന അവസ്ഥയിലാണ്. ഇതേ തുടര്‍ന്ന് ഹൈവേകളും പാലങ്ങളും ഉള്‍പ്പെടെയുള്ളവ അടച്ചിട്ടിരിക്കുകയാണ്. അതേസമയം സുനാമി മുന്നറിയിപ്പില്ലെന്ന് യു.എസ് ജിയോളജിക്കല്‍ സര്‍വേ അറിയിച്ചിട്ടുണ്ട്.
എങ്കിലും തുടര്‍ ചലനങ്ങള്‍ ഉണ്ടാകുന്നുണ്ട്. തായ്‌വാനിലെ പ്രശസ്തമായ വിനോദസഞ്ചാര കേന്ദ്രമാണ് ഹുവാലിന്‍. ഒരു ലക്ഷത്തോളം ജനങ്ങളാണ് ഇവിടെയുള്ളത്. ഇന്നലെ വൈകിയും രക്ഷാപ്രവര്‍ത്തനം തുടരുകയാണ്.