കാണ്‍പൂര്‍: കേരളം, അണ്ടര്‍ 23 ഏകദിന ക്രിക്കറ്റ് പോരാട്ടത്തിന്റെ സെമിയിലേക്ക് മുന്നേറി. ക്വാര്‍ട്ടര്‍ പോരാട്ടത്തില്‍ രാജസ്ഥാനെ 18 റണ്‍സിന് കീഴടക്കിയാണ് കേരളം അവസാന നാലിലേക്ക് കടന്നത്. ആദ്യം ബാറ്റ് ചെയ്ത കേരളം നിശ്ചിത 50 ഓവറില്‍ എട്ട് വിക്കറ്റ് നഷ്ടത്തില്‍ 246 റണ്‍സെടുത്തപ്പോള്‍ രാജസ്ഥാന്റെ പോരാട്ടം 48.2 ഓവറില്‍ 228 റണ്‍സില്‍ അവസാനിപ്പിച്ചാണ് കേരളം സെമി ബര്‍ത്ത് ഉറപ്പിച്ചത്.
വിജയത്തിലേക്ക് ബാറ്റേന്തിയ രാജസ്ഥാന് മികച്ച തുടക്കം ലഭിച്ചിട്ടും അത് മുതലാക്കാന്‍ സാധിക്കാതെ പോയി. ഓപണര്‍മാരായ എം.എന്‍ സിങ് (60), അഭിജിത് തോമര്‍ (75) എന്നിവര്‍ ചേര്‍ന്ന് ഒന്നാം വിക്കറ്റില്‍ 140 റണ്‍സെടുത്ത് ഉജ്ജ്വല തുടക്കമാണ് അവര്‍ക്ക് നല്‍കിയത്. പിന്നീട് വന്നവരെല്ലാം ക്ഷണത്തില്‍ കൂടാരം കയറിയത് വിനയായി. കേരളത്തിനായി ഫാബിദ് അഹമദ് മൂന്നും ഫനൂസ് രണ്ടും വിക്കറ്റുകള്‍ വീഴ്ത്തി. മൂന്ന് രാജസ്ഥാന്‍ താരങ്ങളുടെ റണ്ണൗട്ടുകളും കളിയില്‍ നിര്‍ണായകമായി.
നേരത്തെ ടോസ് നേടി കേരളം ബാറ്റിങ് തിരഞ്ഞെടുക്കുകയായിരുന്നു. ഡാരിയല്‍ ഫെരാരിയോ (84), രോഹന്‍ കുന്നുമ്മല്‍ (40), ക്യാപ്റ്റന്‍ സല്‍മാന്‍ നിസാര്‍ (42) എന്നിവരുടെ ബാറ്റിങ് മികവാണ് കേരളത്തിന് പൊരുതാവുന്ന സ്‌കോര്‍ സമ്മാനിച്ചത്.