റിയാദ്: യമനില്‍ നിന്നും വിമത വിഭാഗമായ ഹൂതികള്‍ സഊദിയെ ലക്ഷ്യമാക്കി വീണ്ടും ബാലിസ്റ്റിക് മിസൈല്‍ ആക്രമണം.

സഊദിയിലെ അസീര്‍ പ്രവിശ്യയിലെ ഖമീസ് മുഷൈത് ലക്ഷ്യമാക്കിയാണ് ഹൂതി വിമത സേന മിസൈല്‍ ആക്രമണം നടത്തിയത്. എന്നാല്‍ സഊദി റോയല്‍ എയര്‍ഫോഴ്‌സ് ആകാശത്തു വെച്ചു തന്നെ അതു തകര്‍ക്കുകയായിരുന്നു.

ബുധനാഴ്ച രാത്രിയാണ് സംഭവം. ഖമീസ് മുശൈത് ആകാശത്തു വെച്ച് തങ്ങളുടെ പാട്രിയറ്റ് മിസൈല്‍വേധ ആയുധം കൊണ്ട് മിസൈല്‍ തകര്‍ത്തതിന്റെ ശബ്ദം പ്രദേശ വാസികളെ ഭയചികതരാക്കിയതായി പ്രദേശിക ഓണ്‍ലൈന്‍ മാധ്യമങ്ങള്‍ റിപ്പോർട്ട് ചെയ്തു.

സംഭവത്തില്‍ ആളപായം റിപ്പോര്‍ട്ട് ചെയ്യപ്പെട്ടിട്ടില്ല. നേരത്തെയും നിരവധി തവണ സഊദിക്കതിരെ ഹൂതി മിസൈല്‍ ആക്രമണം നടത്തിയിരുന്നു.

അതേസമയം, അസീര്‍ പ്രവിശ്യയിലെ അബഹ വിമാനത്താവളം ലക്ഷ്യമാക്കി തങ്ങള്‍ ദീര്‍ഘദൂര മിസൈല്‍ വിക്ഷേപിച്ചതായി ഹൂതി വിഭാഗം വ്യക്തമാക്കി.

തങ്ങളുടെ ലക്ഷ്യ സ്ഥാനത്ത് മിസൈല്‍ പതിച്ചതായും ഇവര്‍ അവകാശപ്പെട്ടു. ബുധനാഴ്ച മരണ വീട്ടിലേക്ക് സഊദി സേന നടത്തിയ വ്യോമാക്രമണത്തില്‍ എട്ട് സ്ത്രീകള്‍ കൊല്ലപ്പെടാന്‍ ഇടയായതിനുള്ള മറുപടിയാണ് ആക്രമണമെന്നും ഇവര്‍ പറഞ്ഞു.