ഹരിയാന: മേജര്‍ സതീഷ് ദഹിയ, ജമ്മു കശ്മിരിലെ ഹന്‍ദ്വാരയില്‍ കഴിഞ്ഞ ദിവസം തീവ്രവാദികളുമായുണ്ടായ ഏറ്റുമുട്ടലില്‍ കൊല്ലപ്പെട്ട ഈ സൈനികന്റെ മരണവാര്‍ത്ത ചെവികളിലെത്തി ഏതാനും മണിക്കൂറുകള്‍ കഴിഞ്ഞാണ് ആ സമ്മാനം ഭാര്യയുടെ കൈകളിലെത്തിയത്. മൂന്നാം വിവാഹ വാര്‍ഷിക ദിനത്തില്‍ തന്റെ പ്രിയതമയ്ക്കായി അയച്ച ആ സമ്മാനപ്പൊതി അവരുടെ കൈകളിലെത്തിയതും കണ്ണീരില്‍ കുതിര്‍ന്നുപോയിരുന്നു. തന്റെ മൂന്നു വര്‍ഷത്തെ ജീവിതത്തെ മധുരമയമാക്കിയതിന് കേക്കും വെളിച്ചം നല്‍കിയതിന് കാന്‍ഡിലും സുഗന്ധം നിറച്ചതിന് പൂക്കളുമായിരുന്നു മേജര്‍ ആ സമ്മാനപ്പെട്ടിയില്‍ നിറച്ചിരുന്നത്.

കഴിഞ്ഞ ചൊവ്വാഴ്ച്ചയാണ് 31 കാരനായ മേജര്‍ സതീഷ് തീവ്രവാദികളുമായുണ്ടായ ഏറ്റുമുട്ടലില്‍ കൊല്ലപ്പെട്ടത്. ബുധനാഴ്ച്ചയായിരുന്നു ഇവരുടെ വിവാഹവാര്‍ഷിക ദിനം. മരണവാര്‍ത്ത കേട്ട് തകര്‍ന്നു പോയെങ്കിലും അദ്ദേഹത്തെ കുറിച്ചോര്‍ത്ത് താനും കുടുംബവും അഭിമാനിക്കുന്നുവെന്ന് മേജറുടെ ഭാര്യ സുജാത പറഞ്ഞു.