മാഡ്രിഡ്: പകരക്കാരനായി ഇറങ്ങി അഞ്ചു മിനുട്ടിനുള്ളില്‍ മൂന്നു ഗോളുകള്‍ വലയിലാക്കി ഹാട്രിക്കുമായി തിളങ്ങി ഫ്രഞ്ച് സ്‌ട്രൈക്കര്‍ കെവിന്‍ ഗമെയ്‌റോയുടെ തകര്‍പ്പന്‍ പ്രകടനം. സ്പാനിഷ് ലാ ലിഗ പോരാട്ടത്തില്‍ സ്‌പോര്‍ടിങ് ഗിജോണിനെതിരേ അത്‌ലറ്റിക്കോ മാഡ്രിഡിനു അപ്രതീക്ഷിതം വിജയമാണു ഫ്രാന്‍സ് താരം തന്റെ മാരക മികവില്‍ സമ്മാനിച്ചത്. കളിയുടെ ആദ്യ പകുതി ഗോള്‍രഹിതമായപ്പോള്‍ രണ്ടാം പകുതിയുടെ 46ാം മിനുട്ടില്‍ കാരസ്‌കോയിലൂടെ അത്‌ലറ്റിക്കോ ലീഡെടുത്തെങ്കിലും 49ാം മിനുട്ടില്‍ സ്‌പോര്‍ടിങ് ഗോള്‍ മടക്കി. മത്സരം സമനിലയില്‍ അവസാനിക്കുമെന്ന പ്രതീതി നില്‍ക്കേ പരിശീലകന്‍ ഡീഗോ സിമിയോണി മുന്നേറ്റത്തില്‍ നിന്നു ഫെര്‍ണാണ്ടോ ടോറസിനെ പിന്‍വലിച്ച് ഗമെയ്‌റോയെ കളത്തിലിറക്കി. അതിന്റെ ഫലമായിരുന്നു മികച്ച വിജയത്തിലേക്കുള്ള അത്‌ലറ്റിക്കോയുടെ പ്രയാണം. 80, 81, 85 മിനുട്ടുകളിലാണ് ഗമെയ്‌റോ വല ചലിപ്പിച്ചത്. ജയത്തോടെ 45 പോയിന്റുമായി അത്‌ലറ്റിക്കോ നാലാം സ്ഥാനത്ത്.
പരുക്കേറ്റ് മൂന്നു മാസം വിശ്രമത്തിലായിരുന്ന ഗെരത് ബെയ്ല്‍ തിരിച്ചുവരവ് ഗോളോടെ ആഘോഷിച്ചു. റയല്‍ മാഡ്രിഡ് സ്വന്തം തട്ടകത്തില്‍ നടന്ന പോരാട്ടത്തില്‍ മറുപടിയില്ലാത്ത രണ്ടു ഗോളുകള്‍ക്ക് എസ്പാന്യോളിനെ വീഴ്ത്തിയപ്പോള്‍ ആല്‍വരോ മൊറാറ്റ ആദ്യ ഗോളും ബെയ്ല്‍ രണ്ടാം ഗോളും നേടി പട്ടിക പൂര്‍ത്തിയാക്കി.
മറ്റൊരു മത്സരത്തില്‍ ഗ്രനാഡ മികച്ച വിജയം സ്വന്തമാക്കി. സ്വന്തം തട്ടകത്തില്‍ 4-1നു അവര്‍ റയല്‍ ബെറ്റിസിനെ വീഴ്ത്തി.