ശ്രീനഗര്‍: കരണ്‍ നഗര്‍ സി.ആര്‍.പി.എഫ് ക്യാംപിനുനേരെ ആക്രമണം നടത്തിയ രണ്ട് ഭീകരരേയും വധിച്ചതായി സൈനിക വക്താവ്.
ഭീകരര്‍ക്കായി നടത്തിയ തിരച്ചിലിനൊടുവില്‍ രണ്ടുപേരുടെ മൃതദേഹങ്ങള്‍ കണ്ടെടുത്തു. തുടര്‍ന്ന് ഇവര്‍ ഒളിച്ചിരുന്ന കെട്ടിടത്തില്‍ കൂടുതല്‍പേരുണ്ടോയെന്ന് കണ്ടെത്തുന്നതിനായി ഇന്നലെയും തിരച്ചില്‍ നടത്തിയെങ്കിലും ആരേയും കണ്ടെത്താനായില്ലെന്ന് സി.ആര്‍.പി.എഫ് അറിയിച്ചു. ഇന്നലെ തിരച്ചില്‍ അവസാനിപ്പിച്ചതായും സൈന്യം അറിയിച്ചു. കൊല്ലപ്പെട്ട ഭീകരരില്‍ നിന്ന് രണ്ട് എ.കെ 47 തോക്കുകളും എട്ട് സ്‌ഫോടക വസ്തുക്കളും കണ്ടെടുത്തതായി സി.ആര്‍.പി.എഫ് ഐ.ജി രവിദീപ് സാഹി അറിയിച്ചു. സി.ആര്‍.പി.എഫ് കേന്ദ്രത്തിനുനേരെ ഭീകരര്‍ നടത്തിയ ആക്രമണത്തില്‍ ഒരു സൈനികന്‍ മരിച്ചിരുന്നു. തുടര്‍ന്നാണ് സൈന്യം തിരച്ചില്‍ നടത്തി ആക്രമണം നടത്തിയ രണ്ട് ഭീകരരേയും കൊലപ്പെടുത്തിയത്.
സുജുവാന്‍ സൈനിക ക്യാംപിനു നേരെയുണ്ടായ ഭീകരാക്രമണത്തില്‍ മരിച്ചവരുടെ എണ്ണം ഏഴായിട്ടുണ്ട്. സൈനിക കേന്ദ്രത്തിനകത്ത് ഭീകരര്‍ക്കായി നടത്തിയ തിരച്ചിലിലാണ് മൃതദേഹങ്ങള്‍ കണ്ടെടുത്തത്.
മരിച്ചവരില്‍ ആറുപേര്‍ സൈനികരാണ്. കുട്ടികളും സ്ത്രീകളും അടക്കം 10 പേര്‍ക്ക് പരുക്കേല്‍ക്കുകയും ചെയ്തു.