പൊവ്വല്‍: എസ്.എഫ്‌ഐ നേതാവും കലോത്സവ സംഘാടകനുമായ അഫ്‌സലിന്റെ അപകടമരണത്തെ തുടര്‍ന്ന് നിര്‍ത്തിവച്ച കണ്ണൂര്‍ സര്‍വകലാശാല കലോത്സവം പൊവ്വല്‍ എല്‍.ബി.എസ് എന്‍ജിനിയറിങ് കോളജില്‍ ഇന്ന് പുനരാരംഭിക്കും. നേരത്തെ നിശ്ചയിച്ചത് പ്രകാരമുള്ള മത്സരങ്ങളായിരിക്കും ഇന്നു നടക്കുക. ഇന്നലെ നടക്കേണ്ടിയിരുന്ന മത്സരങ്ങള്‍ നാളെ നടക്കും. കണ്ണൂര്‍ യൂനിവേഴ്‌സിറ്റി വൈസ് ചാന്‍സലറുടെ നിര്‍ദേശപ്രകാരമാണു കലോത്സവ മത്സര ക്രമം പുനഃക്രമീകരിച്ചത്. 150 പോയന്റുമായി പയ്യന്നൂര്‍ കോളജാണ് ഇപ്പോള്‍ മുന്നില്‍. 122 പോയന്റുമായി കാഞ്ഞങ്ങാട് നെഹ്‌റു ആര്‍ട്‌സ് ആന്റ് സയന്‍സ് കോളജാണ് രണ്ടാം സ്ഥാനത്ത്. 98 പോയന്റുമായി കാസര്‍കോട് ഗവ. കോളജാണു മൂന്നാംസ്ഥാനത്ത്.