കൊട്ടാരക്കര: ഡി.വൈ.എഫ്.ഐ പ്രവര്‍ത്തകനെ എസ്.ഐ കസ്റ്റഡിയിലെടുത്ത് മര്‍ദിച്ചതായി പരാതി. കൊട്ടാരക്കര നിഥിന്‍ ഭവനത്തില്‍ നിഥിന്‍രാജ് (25) നെയാണ് പൊലിസ് കസ്റ്റഡിയിലെടുത്ത് മര്‍ദിച്ചത്.
ഇന്നലെ രാവിലെ 12ഓടെ കൊട്ടാരക്കര താലൂക്ക് ആശുപത്രിക്ക് സമീപം നില്‍ക്കുകയായിരുന്ന തന്നെ പൊലിസ് ജീപ്പില്‍ കയറ്റി മര്‍ദിച്ചതായി നിഥിന്‍ പറയുന്നു.
ഡി.വൈ.എഫ്.ഐ ടൗണ്‍ യൂനിറ്റ് സെക്രട്ടറിയാണ് നിഥിന്‍. വാഹനങ്ങള്‍ക്കു നേരെ കല്ലെറിഞ്ഞവരെ തേടിയിറങ്ങിയ പൊലിസ് സംഘമാണ് നിഥിനെ കസ്റ്റഡിയിലെടുത്തത്.
മര്‍ദനം സംബന്ധിച്ച ഉയര്‍ന്ന പൊലിസ് ഉദ്യോഗസ്ഥര്‍ക്ക് പരാതി നല്‍കുമെന്ന് നിഥിന്‍ പറഞ്ഞു. ദലിത് വിഭാഗത്തില്‍പെട്ട നിഥിനെ മര്‍ദിച്ചതില്‍ പ്രതിഷേധം ഉയര്‍ന്നിട്ടുണ്ട്.