ലതാകിയ: സിറിയയില്‍ അധികാരം വിമതര്‍ പിടിച്ചതോടെ വിമതരെ തുരുത്താന്‍ അസദിനൊപ്പം പ്രവര്‍ത്തിച്ച റഷ്യന്‍ സൈനികര്‍ മടങ്ങുന്നു. ആദ്യ റഷ്യന്‍ കാര്‍ഗോ വിമാനം സിറിയയില്‍നിന്ന് പുറപ്പെട്ടു. കഴിഞ്ഞ ദിവസങ്ങളില്‍ സിറിയയുടെ വിവിധ ഭാഗങ്ങളില്‍ നിന്ന് റഷ്യന്‍ സൈനിക താവളങ്ങളിലെ കവചിത വാഹനങ്ങളും മറ്റും ലതാകിയയിലെ തുറമുഖത്തും മറ്റുമായി എത്തിച്ചിരുന്നു. വിമതര്‍ പിടിച്ചെടുത്ത കേന്ദ്രങ്ങളിലെ റഷ്യന്‍ സൈനിക കവചിത വാഹനങ്ങള്‍ റഷ്യന്‍ പതാകയുമായി നാവിക താവളം ലക്ഷ്യമാക്കി നീങ്ങുന്ന ദൃശ്യങ്ങള്‍ കഴിഞ്ഞ ദിവസം പുറത്തുവന്നിരുന്നു.

ഒരാഴ്ച മുന്‍പുവരെ വിമതരെ തുരത്താന്‍ റഷ്യന്‍ വ്യോമസേന അലെപ്പോയിലടക്കം വന്‍ ആക്രമണങ്ങള്‍ നടത്തിയിരുന്നു. എന്നാല്‍ റഷ്യന്‍ സൈനിക താവളങ്ങള്‍ക്ക് ഇപ്പോള്‍ വിമത സേനയാണ് സംരക്ഷണം നല്‍കുന്നത്.

ലതാകിയയിലെ തീരദേശ താവളമായ ഹുനെയ്മിന്‍ താവളത്തില്‍ നിന്നാണ് ഇന്നലെ ആദ്യ കാര്‍ഗോ വിമാനം ലിബിയയിലേക്ക് പറന്നത്. ഈ താവളത്തിന്റെ കവാടത്തില്‍ വിമത സൈനികരാണ് കാവല്‍ നില്‍ക്കുന്നത്. റഷ്യന്‍ സൈനികര്‍ക്ക് രാജ്യം വിടാനുള്ള സൗകര്യം ചെയ്തു നല്‍കാനാണ് തീരുമാനം. അടുത്ത ദിവസങ്ങളില്‍ കൂടുതല്‍ റഷ്യന്‍ സേന സിറിയ വിടും. സിറിയന്‍ മുന്‍ പ്രസിഡന്റ് ബശ്ശാറുല്‍ അസദിനെ രാജ്യംവിടാന്‍ സഹായിച്ചത് റഷ്യന്‍ വ്യോമസേനയാണ്.

സൈനിക നീക്കത്തിനും മറ്റുമായി സിറിയയിലെ എച്ച്.ടി.എസ് പൊളിറ്റിക്കല്‍ കമ്മിറ്റിയുമായി ചര്‍ച്ച നടത്തിയതായി റഷ്യന്‍ ഉപ വിദേശകാര്യ മന്ത്രി മികായില്‍ ബോഗ്ഡനോവ് പറഞ്ഞു.

With rebel forces gaining control in Syria, Russian troops supporting President Bashar al-Assad have begun withdrawing.