ന്യൂഡല്‍ഹി: 2025ല്‍ നടക്കാനിരിക്കുന്ന ഡല്‍ഹി നിയമസഭാ തെരഞ്ഞെടുപ്പില്‍ അവസാന സ്ഥാനാര്‍ഥി പട്ടിക പുറത്തിറക്കി ആം ആദ്മി പാര്‍ട്ടി. 38 അംഗ സ്ഥാനാര്‍ഥി പട്ടികയാണ് പുറത്തുവിട്ടത്. അരവിന്ദ് കെജ് രിവാള്‍ ഇത്തവണ ന്യൂഡല്‍ഹിയില്‍ നിന്ന് ജനവിധി തേടും. മുഖ്യമന്ത്രി അതിഷി ഒരിക്കല്‍കൂടി കല്‍ക്കാജിയില്‍ നിന്ന് മത്സരിക്കും. സൗരഭ് ഭരദ്വാജ് ഗ്രേറ്റര്‍ കൈലാഷിലാണ് മത്സരിക്കുക. 

കസ്തൂര്‍ബ നഗറില്‍ ബിജെപി വിട്ട് പാര്‍ട്ടിയിലെത്തിയ രമേഷ് പെഹ്ല്‌വാനെ പരീക്ഷിക്കാനാണ് പാര്‍ട്ടി നീക്കം. നിലവില്‍ മദന്‍ലാല്‍ ആണ് അവിടെ എംഎല്‍എ. രമേഷ് പെഹ്ലുവാനും അദ്ദേഹത്തിന്റെ ഭാര്യയും കൗണ്‍സിലറുമായ കുസും ലതയും കഴിഞ്ഞ ദിവസമാണ് ബിജെപി വിട്ട് ആം ആദ്മി പാര്‍ട്ടിയിലെത്തിയത്. 

ഇതിന് പുറമെ ഗോപാല്‍റായ്, സത്യേന്ദ്ര കുമാര്‍ ജെയ്ന്‍, ദുര്‍ഗേഷ് പതക് തുടങ്ങിയവരും പട്ടികയില്‍ ഇടം നേടിയിട്ടുണ്ട്.

മത്സരത്തില്‍ പൂര്‍ണ്ണ ആത്മവിശ്വാസമുണ്ടെന്ന് അരവിന്ദ് കെജ് രിവാള്‍ പറഞ്ഞു. ബിജെപി ചിത്രത്തിലില്ലെന്നും, കൃത്യമായ ആസൂത്രണമോ, ഡല്‍ഹിയെ കുറിച്ചുള്ള കാഴ്ച്ചപ്പാടോ അവര്‍ക്കില്ലെന്നും അദ്ദേഹം കൂട്ടിച്ചേര്‍ത്തു. 

Delhi Assembly Elections aam admi panel