ലണ്ടന്‍: സ്‌പേസ് എക്‌സ് സി.ഇ.ഒ ഇലണ്‍ മസ്‌ക് 2040നകം മനുഷ്യനെ ചൊവ്വയിലെത്തിക്കുമെന്ന് ബഹിരാകാശയാത്രികനായ ടിം പീക്ക്. അന്താരാഷ്ട്ര സ്‌പേസ് സ്റ്റേഷനിലേക്ക് അയക്കപ്പെട്ട ആദ്യ ബ്രിട്ടീഷ് ബഹിരാകാശ യാത്രികനാണ് ടിം പീക്ക്.
ഇലണ്‍ മസ്‌കിന്റെ സ്‌പേസ് എക്‌സ് ലോകത്തെ ഏറ്റവും കരുത്തുറ്റ റോക്കറ്റ് ഫാല്‍ക്കണ്‍ ഹെവി വിജയകരമായി വിക്ഷേപിച്ചതിനു പിന്നാലെയാണു പുതിയ വെളിപ്പെടുത്തല്‍. ബഹിരാകാശ പര്യവേക്ഷണത്തില്‍ വളരെ ആകാംക്ഷ നിറഞ്ഞ കാലഘട്ടത്തിലേക്കാണു മനുഷ്യകുലം പ്രവേശിക്കുന്നത്.
2030ന്റെ അവസാന പാദത്തില്‍ തന്നെ അതു സംഭവിക്കുമെന്നാണു താന്‍ കരുതുന്നതെന്നും അതുകൊണ്ടു തന്നെയാണ് സര്‍ക്കാര്‍ ബഹിരാകാശ ഏജന്‍സികളും അന്താരാഷ്ട്ര ബഹിരാകാശ പര്യവേക്ഷണ സംഘവും ഒന്നിച്ചു പ്രവര്‍ത്തിക്കുന്നതെന്നും ടിം പീക്ക് പറഞ്ഞു.
മനുഷ്യനിര്‍മിതമായ ഏറ്റവും കരുത്തേറിയ റോക്കറ്റായ ഫാല്‍ക്കണ്‍ ഹെവി ഈ മാസം ആറിനാണു വിജയകരമായി വിക്ഷേപിച്ചത്.