മൊണാക്കോ: 2017 മികച്ച കായിക താരത്തിനുള്ള ലോറസ് പുരസ്‌കാരം സ്വിറ്റ്‌സര്‍ലന്‍ഡിന്റെ ഇതിഹാസ ടെന്നീസ് താരം റോജര്‍ ഫെഡറര്‍ക്ക്. 2017ലെ മികച്ച കായിക താരത്തിനുള്ള പുരസ്‌കാരത്തിന് പുറമേ തിരിച്ചു വരവ് നടത്തിയ മികച്ച താരമെന്ന പുരസ്‌കാരവും ഫെഡ് എക്‌സ്പ്രസ് സ്വന്തമാക്കി. വനിതാ വിഭാഗത്തില്‍ ടെന്നീസ് താരം തന്നെയായ സെറീന വില്ല്യംസിനാണ് അവാര്‍ഡ്.
ടെന്നീസ് താരം റാഫേല്‍ നദാല്‍, ദീര്‍ഘ ദൂര ഇതിഹാസം മോ ഫറ, സൈക്ലിങ് താരം ക്രിസ് ഫ്രൂം, ഫോര്‍മുല വണ്‍ ചാംപ്യന്‍ ലൂയീസ് ഹാമില്‍ട്ടന്‍, ഫുട്‌ബോള്‍ താരം ക്രിസ്റ്റ്യാനോ റൊണാള്‍ഡോ എന്നിവരെ പിന്തള്ളിയാണ് സ്വിസ് മാസ്റ്റര്‍ പുരസ്‌കാരം നേടിയത്.
ഇത് അഞ്ചാം തവണയാണ് ഫെഡറര്‍ പുരസ്‌കാര ജേതാവാകുന്നത്. ഏറ്റവും കൂടുതല്‍ ലോറസ് പുരസ്‌കാരം നേടുന്ന ആദ്യ കായിക താരമെന്ന റെക്കോര്‍ഡും അദ്ദേഹം ഇതോടെ സ്വന്തമാക്കി. നാല് പുരസ്‌കാരങ്ങളുമായി സ്പ്രിന്റ് ഇതിഹാസം ഉസൈന്‍ ബോള്‍ട്ടിനൊപ്പം റെക്കോര്‍ഡ് പങ്കിടുകയായിരുന്ന ഫെഡറര്‍ അഞ്ചാം തവണയും നേട്ടം സ്വന്തമാക്കിയാണ് റെക്കോര്‍ഡ് സ്വന്തം പേരിലാക്കിയത്.
പരുക്കും ഫോമില്ലായ്മയും കാരണം കാലം കഴിഞ്ഞെന്ന് വിധിയെഴുതിയവരെ ഞെട്ടിച്ച് 2017ല്‍ ആസ്‌ത്രേലിയന്‍ ഓപണ്‍, വിംബിള്‍ഡണ്‍ കിരീടങ്ങള്‍ നേടി ശക്തമായി തിരിച്ചെത്തിയ ഫെഡറര്‍ ഈ വര്‍ഷം ആദ്യ ഗ്രാന്‍ഡ് സ്ലാമായ ആസ്‌ത്രേലിയന്‍ ഓപണ്‍ നേടി കിരീടം നിലനിര്‍ത്തുകയും 20 ഗ്രാന്‍ഡ് സ്ലാം കിരീടങ്ങളെന്ന അനുപമ നേട്ടം കുറിക്കുകയും ചെയ്തിരുന്നു. പിന്നാലെ ലോക ഒന്നാം നമ്പര്‍ സ്ഥാനം തിരിച്ചുപിടിച്ച് ആ പദവിയിലെത്തുന്ന ഏറ്റവും പ്രായം കൂടിയ താരമെന്ന റെക്കോര്‍ഡും സ്വന്തമാക്കി അവിസ്മരണീയ കുതിപ്പ് തുടരുകയാണ് 36ാം വയസിലും ഫെഡ്. നേരത്തെ 2005, 06, 07, 08 വര്‍ഷങ്ങളില്‍ ഫെഡറര്‍ പുരസ്‌കാരം തുടര്‍ച്ചയായി സ്വന്തമാക്കി റെക്കോര്‍ഡിട്ടിരുന്നു.