കോഴിക്കോട്: മെക് 7നെതിരായ പരാമര്‍ശത്തിനെതിരെ വ്യാപക വിമര്‍ശനമുയര്‍ന്നതിന് പിന്നാലെ വിശദീകരണവുമായി സി.പി.എം ജില്ലാ സെക്രട്ടറി പി മോഹനന്‍. മെക് 7നെതിരെ താന്‍ ഒന്നും പറഞ്ഞിട്ടില്ലെന്ന് മോഹനന്‍ പ്രതികരിച്ചു. തങ്ങള്‍ക്ക് മെക് 7നെ കുറിച്ച് ആക്ഷേപമില്ല. എന്നാല്‍, ഇത്തരം പൊതുകൂട്ടായ്മകളില്‍ നുഴഞ്ഞുകയറി മതനിരപേക്ഷത തകര്‍ക്കാന്‍ സംഘപരിവാര്‍, ജമാഅത്തെ ഇസ്‌ലാമി, എസ്.ഡി.പി.ഐ എന്നിവര്‍ ശ്രമിക്കുന്നുണ്ട്. അതാണ് കഴിഞ്ഞ ദിവസം താന്‍ പറഞ്ഞതെന്നും പി.മോഹനന്‍ വിശദമാക്കി.

എല്ലാതരം വര്‍ഗീയതകളേയും സി.പി.എം എതിര്‍ക്കാറുണ്ട്. ജനങ്ങളെ ഭിന്നിപ്പിക്കുന്ന ഒന്നിനേയും സി.പി.എം അനുകൂലിക്കില്ല. മെക് 7 മുന്‍ സൈനികന്‍ തുടങ്ങിയെന്നാണ് മനസിലാക്കുന്നത്. അതില്‍ പ്രശ്‌നങ്ങളൊന്നുമില്ല. വ്യായാമത്തിനായുള്ള സംഘടന പ്രോല്‍സാഹിപ്പിക്കപ്പെടേണ്ടതാണെന്നും അദ്ദേഹം കൂട്ടിച്ചേര്‍ത്തു.

സി.പി.എം കോഴിക്കോട് ജില്ലാ സെക്രട്ടറി പി. മോഹനന്‍ ആരോപണങ്ങളുമായി രംഗത്തുവന്നതോടെയാണ് നഗരങ്ങളിലും ഗ്രാമങ്ങളിലും വ്യാപകമായ മള്‍ട്ടി എക്‌സര്‍സൈസ് കോമ്പിനേഷന്‍ (മെക് 7) വ്യായാമ കൂട്ടായ്മയെച്ചൊല്ലി വിവാദമുയര്‍ന്നത്. മെക് 7ന് പിന്നില്‍ ജമാഅത്തെ ഇസ്‌ലാമിയാണെന്നും പോപുലര്‍ ഫ്രണ്ട് സ്വാധീനം പിന്നിലുണ്ടെന്നുമാണ് കണ്ണൂര്‍ ജില്ലയില്‍ നടന്ന സി.പി.എം ഏരിയ സമ്മേളനത്തില്‍ മോഹനന്‍ ആരോപിച്ചത്.