മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ കരുത്തരായ റയല്‍ മാഡ്രിഡിനെ സ്വന്തം തട്ടകത്തില്‍ അട്ടിമറിച്ച് എസ്പാന്യോള്‍. മറുപടിയില്ലാത്ത ഒറ്റ ഗോളിനാണ് റയല്‍ ഞെട്ടിക്കുന്ന തോല്‍വി വഴങ്ങിയത്. കളി ഗോള്‍രഹിത സമനിലയില്‍ അവസാനിക്കുമെന്ന പ്രതീതിയില്‍ നില്‍ക്കേ മത്സരം കഴിയാന്‍ നിമിഷങ്ങള്‍ മാത്രമുള്ളപ്പോള്‍ ജെറാര്‍ഡ് മൊറേനോ നേടിയ ഗോളിലാണ് എസ്പാന്യോള്‍ അപ്രതീക്ഷിത വിജയം സ്വന്തമാക്കിയത്. സൂപ്പര്‍ താരം ക്രിസ്റ്റ്യാനോ റൊണാള്‍ഡോ, മധ്യനിരയിലെ ശക്തികളായ ലൂക്കാ മോഡ്രിച്, ടോണി ക്രൂസ് എന്നിവരില്ലാതെയാണ് നിലവിലെ ചാംപ്യന്‍മാര്‍ എസ്പാന്യോളിനെ അവരുടെ തട്ടകത്തില്‍ നേരിട്ടത്. ഫലം സീസണിലെ അഞ്ചാം തോല്‍വിയിലേക്ക് അവര്‍ കൂപ്പുകുത്തി. പോയിന്റ് പട്ടികയില്‍ മൂന്നാം സ്ഥാനത്ത് നില്‍ക്കുന്ന റയലിന് 26 കളികളില്‍ നിന്ന് 51 പോയിന്റ്. രണ്ടാമതുള്ള അത്‌ലറ്റിക്കോ മാഡ്രിഡ് ഒരു മത്സരം കുറച്ച് കളിച്ച് 58 പോയിന്റുമായി നില്‍ക്കുന്നു. ഒന്നാമതുള്ള ബാഴ്‌സയ്ക്ക് 65 പോയിന്റുകള്‍. മറ്റൊരു മത്സരത്തില്‍ ജിറോന 1-0ത്തിന് സെല്‍റ്റ വിഗോയെ കീഴടക്കി.