ബംഗളൂരു: അനധികൃത സ്വത്ത് സമ്പാദനക്കേസില്‍ അണ്ണാ ഡി.എം.കെ നേതാവ് ശശികലക്ക് ജയിലില്‍ അനധികൃത സൗകര്യങ്ങള്‍ നല്‍കിയിരുന്നുവെന്ന കേസ് കര്‍ണാടക അഴിമതി വിരുദ്ധ വിഭാഗം അന്വേഷിക്കുമെന്ന് സര്‍ക്കാര്‍ അറിയിച്ചു.
മുന്‍ ജയില്‍ ഡെപ്യൂട്ടി ഐ.ജി ഡി. രൂപയാണ് ശശികലക്ക് ജയിലില്‍ അനധികൃത സൗകര്യങ്ങള്‍ ലഭിക്കുന്നുണ്ടെന്ന കാര്യം വെളിപ്പെടുത്തിയത്.
ജയില്‍ അധികൃതര്‍ക്ക് രണ്ടുകോടി രൂപ കൈക്കൂലി നല്‍കിയാണ് ഇത്തരത്തിലുള്ള സൗകര്യങ്ങള്‍ ശശികല അനുഭവിച്ചിരുന്നതെന്നും ഇതിന് മുന്‍ ജയില്‍ ഡയരക്ടര്‍ ജനറല്‍ എച്ച്.എന്‍ സത്യനാരായണ റാവു കൂട്ടുനിന്നുവെന്നും അവര്‍ റിപ്പോര്‍ട്ട് ചെയ്തിരുന്നു.
ഇതേ തുടര്‍ന്ന് വിവാദമുയര്‍ന്നതോടെ രൂപക്കെതിരേയും അവര്‍ ഉന്നയിച്ച ആരോപണത്തെ സംബന്ധിച്ചും അന്വേഷിക്കാന്‍ സര്‍ക്കാര്‍ തീരുമാനിച്ചിരുന്നു. തുടര്‍ന്നാണ് അന്വേഷണം ആന്റി കറപ്ഷന്‍ ബ്യൂറോയെ എല്‍പ്പിക്കാന്‍ സര്‍ക്കാര്‍ തീരുമാനിച്ചത്.