പുല്‍പ്പള്ളി: കര്‍ണാടകയിലെവനം വകുപ്പ് ഉദ്യോഗസ്ഥനെ കാട്ടാന ചവിട്ടിക്കൊന്നു. നാഗര്‍ഹോള വന്യജീവി സങ്കേതത്തിലെ കണ്‍സര്‍വേറ്ററും ഫീല്‍ഡ് ഡയറക്ടറുമായ മണികണ്ഠന്‍ (48) ആണ് മരിച്ചത്.
ഇന്നലെ ഉച്ചക്ക് 12.45ഓടെ ഡിബികുപ്പ റെയ്ഞ്ചിലെ ബെള്ള ഫോറസ്റ്റിലെ കാക്കന്‍കോട്ടൈ കബനി തീരത്താണ് സംഭവം. കഴിഞ്ഞ ദിവസം കാട്ടുതീ വ്യാപക നാശനഷ്ടങ്ങള്‍ വരുത്തിയ ഡിബി കുപ്പെ റെയ്ഞ്ചിലെ സ്ഥലങ്ങള്‍ ഉദ്യോഗസ്ഥരോടൊപ്പം സന്ദര്‍ശിച്ചു മടങ്ങുമ്പോള്‍ ആനയുടെ മുന്നില്‍ അകപ്പെടുകയായിരുന്നു.
തുമ്പിക്കൈ കൊണ്ട് അടിച്ചുവീഴ്ത്തിയ ശേഷം ചവിട്ടി കൊല്ലുകയായിരുന്നുവെന്ന് അദ്ദേഹത്തിനൊപ്പമുണ്ടായിരുന്നവര്‍ പറഞ്ഞു. 10 പേരാണ് സംഘത്തില്‍ ഉണ്ടായിരുന്നത്. മറ്റുള്ളവര്‍ ഓടി രക്ഷപ്പെട്ടു. ഇതില്‍ ചിലര്‍ക്കു നിസാര പരുക്കേറ്റിട്ടുണ്ട്. മൃതദേഹം എച്ച്.ഡികോട്ട താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. ഹുന്‍സൂരിലാണ് താമസിച്ച് വന്നിരുന്നത്. ഞായറാഴ്ച മൈസൂര്‍ കെ.ആര്‍ ആശുപത്രിയില്‍ പോസ്റ്റുമാര്‍ട്ടം നടത്തും. തമിഴ്‌നാട് മധുരൈ സ്വദേശിയായ ഇദ്ദേഹം 2001 ഐ.എഫ്.എസ് ബാച്ചുകാരനാണ്. ഭാര്യയും രണ്ടു മക്കളുമുണ്ട്.