ഐ.എസ്.എല്‍ പോരാട്ടങ്ങള്‍ അവസാന നാലിലേക്ക് ചുരുങ്ങി. ഇനി ഇരു പാദ സെമി പോരാട്ടങ്ങളാണ് നടക്കാനുള്ളത്. നാളെ ഒന്നാം സെമിയുടെ ആദ്യ പാദത്തില്‍ എഫ്.സി പൂനെ സിറ്റി- ബംഗളൂരു എഫ്.സിയുമായി ഏറ്റുമുട്ടും. പത്തിന് നടക്കുന്ന രണ്ടാം സെമിയുടെ ആദ്യ പാദത്തില്‍ എഫ്.സി ഗോവ- ചെന്നൈയിന്‍ എഫ്.സിയുമായി ഏറ്റുമുട്ടും. രണ്ട് സെമികളുടേയും രണ്ടാം പാദ മത്സരങ്ങള്‍ 11, 13 തിയതികളിലും നടക്കും.
പ്രാഥമിക റൗണ്ടില്‍ 180 മത്സരങ്ങളാണ് അരങ്ങേറിയത്. മൊത്തം 229 ഗോളുകള്‍ ടീമുകള്‍ എതിര്‍ പോസ്റ്റില്‍ നിക്ഷേപിച്ചു. 42 ഗോളുകളുമായി ഗോവയാണ് ഗോളടിയില്‍ മുന്നിലെത്തിയത്. 35 ഗോളുകളുമായി ബംഗളൂരു രണ്ടാം സ്ഥാനത്തും 30 ഗോളുകളുമായി പൂനെ മൂന്നാം സ്ഥാനത്തും നില്‍ക്കുന്നു. 18 ഗോളുകളുമായി ഗോവന്‍ താരം ഫെറാന്‍ കൊറോമിനസാണ് ഗോളടിയില്‍ മുന്നില്‍. ടൂര്‍ണമെന്റിന്റെ തുടക്കം മുതല്‍ തന്നെ താരം ഗോളടിച്ച് മുന്നിലുണ്ട്. ബംഗളൂരു താരം മികു 14 ഗോളുകളുമായി രണ്ടാമതും ഡല്‍ഹിയുടെ കാലു ഉച്ചെ 13 ഗോളുകളുമായി മൂന്നാം സ്ഥാനത്തും നില്‍ക്കുന്നു. ഗോള്‍ കീപ്പര്‍മാരില്‍ 55 സേവുകളുമായി മുംബൈ സിറ്റി എഫ്.സിയുടെ അമരീന്ദര്‍ സിങാണ് മുന്നില്‍. ഏറ്റവും കൂടുതല്‍ ക്ലീന്‍ ഷീറ്റുകള്‍ ഉള്ളത് ബംഗളൂരു എഫ്.സിക്കാണ്. ഏഴ് ക്ലീന്‍ ഷീറ്റുകള്‍. ഗോള്‍ഡന്‍ ബൂട്ടിനായി മുന്നിലുള്ളത് കൊറോമിനസും ഗോള്‍ഡന്‍ ഗ്ലൗവിനായി മുന്നില്‍ നില്‍ക്കുന്നത് ഗുര്‍പ്രീത് സിങും.