കക്കട്ടില്‍: മൊകേരി ഗവ. കോളജില്‍ രണ്ടു ദിവസം നീണ്ടു നില്‍ക്കുന്ന ശാസ്ത്രയാന്‍ മികവു പ്രദര്‍ശനത്തിന് ഇന്ന് തുടക്കമാവും. സംസ്ഥാനത്തെ35 ഗവ. കോളജുകളിലെ പഠന സൗകര്യങ്ങളും ഗവേഷണ വകുപ്പുകളുടെ പ്രവര്‍ത്തനവും ജനങ്ങളിലെത്തിക്കുകയെന്ന ലക്ഷ്യത്തോടെയാണ് മികവ് എന്ന പേരിലുള്ള ശാസ്ത്രയാന്‍ പ്രദര്‍ശനം ഒരുക്കിയിരിക്കുന്നത്. ഉന്നത വിദ്യാഭ്യാസ പദ്ധതി (റൂസ) യുടെ സാമ്പത്തിക സഹായത്തോടെയാണ് പരിപാടി നടത്തുന്നത്. ചരിത്രം, ഇംഗ്ലീഷ്, കൊമേഴ്‌സ്, ഗണിത ശാസ്ത്രം, പൗരസ്ത്യഭാഷാ വകുപ്പുകള്‍ എന്നിവ ചേര്‍ന്നു നടത്തുന്ന ഗണിത ലാബ്,ഫിലിം ഫെസ്റ്റിവല്‍, ചരിത്ര മ്യൂസിയം, സംരഭകത്വ മേള, ചിത്രകലാ പ്രദര്‍ശനം, ജി.എസ്.ടി ശില്‍പശാല, കരിയര്‍ ഗൈഡന്‍സ് തുടങ്ങിയവ ശാസ്ത്രയാന്റെ ഭാഗമായി നടക്കും. ഇതിനു പുറമേ വിവിധ സര്‍ക്കാര്‍ ഏജന്‍സികളുടെയും മറ്റും വൈവിധ്യമാര്‍ന്ന പ്രദര്‍ശനങ്ങളുമുണ്ടാവും. പ്രദര്‍ശനം സൗജന്യമായിരിക്കും. വാര്‍ത്താ സമ്മേളനത്തില്‍ പ്രിന്‍സിപ്പല്‍ ഡോ. പി.കെ മീര, പ്രൊഫ. കെ.കെ അഷ്‌റഫ് ,പ്രൊഫ. എം.പി സൂപ്പി, പ്രൊഫ. മുഹമ്മദ് അബ്ദുള്‍ കയ്യും, ഡോ. ദിനേശ് തുടങ്ങിയവര്‍ പങ്കെടുത്തു.