ഇരിക്കൂര്‍: കൂടാളി പഞ്ചായത്തിലെ ആയിപ്പുഴ ജങ്ഷന്‍ പാണലാട്ട് റോഡ് തകര്‍ന്നതില്‍ പ്രതിഷേധിച്ച് ഓട്ടോ തൊഴിലാളികള്‍ നടത്തിയ പണിമുടക്കും ഹര്‍ത്താലും പൂര്‍ണം. നിരവധി തവണ ത്രിതല പഞ്ചായത്ത് അധികൃതരുടെയും മറ്റു ജനപ്രതിനിധികളുടെയും ശ്രദ്ധയില്‍പ്പെടുത്തിയിട്ടും നടപടിയുണ്ടാകാത്തതിനെ തുടര്‍ന്നാണ് ഓട്ടോതൊഴിലാളികള്‍ പണിമുടക്കും ഹര്‍ത്താലും നടത്തിയത്.
ബസുകളും ടാക്‌സികളും ഇല്ലാത്ത ഈ മേഖലയിലെ ഓട്ടോ സമരം ജനങ്ങളെ വലച്ചു. റോഡിന്റെ ഒരു ഭാഗത്ത് ഓവുചാലും നടപ്പാതയും നിര്‍മിച്ച് റോഡ് ഗതാഗതയോഗ്യമാക്കണമെന്ന് സംയുക്ത ഓട്ടോ തൊഴിലാളികള്‍ ആവശ്യപ്പെട്ടു. അതേസമയം റോഡ് അറ്റകുറ്റപ്പണി നടത്തിയില്ലെങ്കില്‍ അനിശ്ചിതകാല പണിമുടക്ക് നടത്താനുള്ള നീക്കത്തിലാണ് ഓട്ടോതൊഴിലാളികള്‍.