പഞ്ചായത്ത് അനുബന്ധ സ്ഥാപനങ്ങളില്‍ ബോള്‍ പേനകള്‍ ഉപയോഗിക്കില്ല. ഈ സന്ദേശം പഞ്ചായത്ത് പരിധിയിലെ സ്‌കൂളുകളിലേക്കു വ്യാപിപ്പിക്കും
ചെര്‍ക്കള: ചെങ്കള പഞ്ചായത്ത് 2018-19 വര്‍ഷത്തെ ബജറ്റ് അവതരിപ്പിച്ചു. പ്രകൃതി സംരക്ഷണ വികസന പദ്ധതികള്‍ക്ക് മുഖ്യ പരിഗണന നല്‍കിയുള്ള ബജറ്റാണ് അവതരിപ്പിച്ചത്. 23.98 കോടി രൂപ വരവും 22.99 കോടി രൂപ ചെലവും പ്രതീക്ഷിക്കുന്ന ബജറ്റാണ് അവതരിപ്പിച്ചത്.
പരിസ്ഥിതി സൗഹൃദ വികസന പദ്ധതികളാണ് ബജറ്റിന്റെ കാതല്‍. ലൈഫ് ഭവന നിര്‍മാണ പദ്ധതിക്ക് രണ്ട് കോടി രൂപയും പരമ്പരാഗത തൊഴില്‍, പ്രത്യേകിച്ച് മണ്‍പാത്ര നിര്‍മാണം സംരക്ഷിക്കുന്നതിനും പ്രോത്സാഹിപ്പിക്കുന്നതിനും തുക നീക്കിവെച്ചിട്ടുണ്ട്. ക്ലീന്‍ ചെങ്കള എന്ന സന്ദേശത്തിന് അനുസൃതമായ രീതിയില്‍ പ്രവര്‍ത്തനോന്മുഖ പദ്ധതി തയാറാക്കും.
ഭൂജല പരിപോഷണത്തിന് 20 ലക്ഷം രൂപ വകയിരുത്തി. ഭൂജല പരിപോഷണം ഒരു പദ്ധതിയായി ഒതുങ്ങാതെ ജനകീയ പ്രവര്‍ത്തനമായി ഏറ്റെടുക്കും. രണ്ട് അങ്കണവാടികളെ അടുത്ത വര്‍ഷം അന്താരാഷ്ട്ര നിലവാരത്തിലെത്തിക്കും. പാരമ്പര്യേതര ഊര്‍ജോപയോഗ പദ്ധതികള്‍ നടപ്പാക്കും. കോളനികളില്‍ സൗരതെരുവുവിളക്കുകളും പഞ്ചായത്ത്, ഘടക സ്ഥാപന ഓഫിസുകളില്‍ സൗരോര്‍ജ്ജ പ്ലാന്റുകളും സ്ഥാപിക്കും.
പഞ്ചായത്ത് അനുബന്ധ സ്ഥാപനങ്ങളില്‍ ബോള്‍ പേനകള്‍ ഉപയോഗിക്കില്ല. ഈ സന്ദേശം പഞ്ചായത്ത് പരിധിയിലെ സ്‌കൂളുകളിലേക്കും വ്യാപിപ്പിക്കും. പ്രസിഡന്റ് ഷാഹിനാ സലിം അധ്യക്ഷയായി. വൈസ് പ്രസിഡന്റ് ഇ. ശാന്തകുമാരി ബജറ്റ് അവതരിപ്പിച്ചു