തിരുവനന്തപുരം: ശിശുക്ഷേമസമിതിയില്‍ പിഞ്ചുകുഞ്ഞിന്റെ ജനനേന്ദ്രിയത്തില്‍ പരിക്കേല്‍പ്പിച്ച മൂന്ന് ആയമാര്‍ അറസ്റ്റില്‍. കിടക്കയില്‍ മൂത്രമൊഴിച്ചതിനാണ് രണ്ടര വയസുകാരിയോട് ആയമാരുടെ ക്രൂരത. ശിശുക്ഷേമ സമിതിയിലെ താല്‍ക്കാലിക ജീവനക്കാരായ അജിത, മഹേശ്വരി, സിന്ധു എന്നിവരാണ് പിടിയിലായത്. 

അജിതയാണ് കുഞ്ഞിനെ മുറിവേല്‍പ്പിച്ചത്. സിന്ധുവും, മഹേശ്വരിയും ഇക്കാര്യം അറിഞ്ഞിട്ടും മറച്ചുവെക്കുകയായിരുന്നു.  മറ്റൊരു ആയ കുളിപ്പിക്കുന്നതിനിടെ കുഞ്ഞ് നിര്‍ത്താതെ കരഞ്ഞതോടെ പരിശോധിച്ചപ്പോഴാണ് ക്രൂരമായി മുറിവേല്‍പ്പിച്ചത് കണ്ടത്. തുടര്‍ന്ന് ഞായറാഴ്ച തൈക്കാട് ആശുപത്രിയിലെത്തിച്ച പരിശോധിച്ചതോടെ കൂടുതല്‍ മുറിവുകള്‍ കണ്ടെത്തുകയായിരുന്നു.

ശിശുക്ഷേമ സമിതി ജനറല്‍ സെക്രട്ടറി അരുണ്‍ ഗോപിയുടെ പരാതിയിലാണ് അറസ്റ്റ്. ഒരിക്കലും സംഭവിക്കാന്‍ പാടില്ലാത്തതാണ് നടന്നതെന്ന് അദ്ദേഹം പറഞ്ഞു. വളരെ കൃത്യതയോടെയാണ് കുട്ടികളെ പരിപാലിക്കുന്നത്. നഖംകൊണ്ട് നുള്ളിയ പാടാണ്. കുട്ടിയെ വൈദ്യപരിശോധനക്കയച്ചു. പിരിച്ചുവിട്ടവരില്‍ മൂന്നുപേരെയാണ് ഇന്ന് അറസ്റ്റ് ചെയ്തത്. രണ്ട് ദിവസം മുമ്പാണ് പരാതി കൊടുത്തത്. ഒറ്റപ്പെട്ട സംഭവം പോലും ഉണ്ടാകരുതെന്നതിന്റെ ഭാഗമായാണ് പരാതി നല്‍കിയത്. ശിശുക്ഷേമ സമിതിയില്‍ കൂടുതലും താത്കാലിക ജീവനക്കാരാണെന്നും അരുണ്‍ ഗോപി പറഞ്ഞു.

minor girl was injured in her genitals for urinating on the bed kerala cwc