ആലപ്പുഴ: കളര്‍കോട് വാഹനാപകടത്തില്‍ വിദ്യാര്‍ഥികള്‍ക്ക് കാര്‍ വാടകക്ക് കൊടുത്ത വാഹന ഉടമക്കെതിരെ നടപടിയുണ്ടാകും. കാര്‍ വാടകയ്ക്ക് കൊടുത്തത് നിയമവിരുദ്ധമായിട്ടാണെന്നാണ് കണ്ടെത്തല്‍. ഇയാള്‍ക്ക് റെന്റ് എ കാര്‍ ലൈസന്‍സില്ല. ടാക്‌സി പെര്‍മിഷനും ഇല്ല. വാഹന ഉടമയോട് അടിയന്തരമായി എന്‍ഫോഴ്‌സ്‌മെന്റ് ആര്‍.ടി.ഒയ്ക്ക് മുന്‍പില്‍ ഹാജരാകാന്‍ നിര്‍ദേശം നല്‍കിയിട്ടുണ്ട്. ആലപ്പുഴ വളഞ്ഞ വഴി സ്വദേശി ഷാമില്‍ ഖാന്റെ ഉടമസ്ഥതയിലുള്ളതാണ് വാഹനം. 

ഏഴ് പേര്‍ക്ക് സഞ്ചാരിക്കാവുന്ന വാഹനമാണ് ടവേര. എന്നാല്‍ ഇതില്‍ 11 പേരാണ് അപകടസമയത്ത് യാത്ര ചെയ്തിരുന്നത്.

അതേസമയം, വണ്ടാനം മെഡിക്കല്‍ കോളജിലെ വിദ്യാര്‍ഥികളുമായുള്ള പരിചയത്തിന്റെ പേരിലാണ് വാഹനം വിട്ടുനല്‍കിയതെന്ന് ഉടമസ്ഥന്‍ ഷാമില്‍ ഖാന്‍ പറഞ്ഞു. അപകടത്തില്‍ മരിച്ച കണ്ണൂര്‍ സ്വദേശി മുഹമ്മദ് ജബ്ബാറാണ് കാറിനായി ബന്ധപ്പെട്ടത്. ജബ്ബാറും മറ്റ് രണ്ടുവിദ്യാര്‍ഥികളുമാണ് കൊണ്ടുപോയതെന്നും ഷമില്‍ ഖാന്‍ പറഞ്ഞു. ജബ്ബാറിന്റെ സഹോദരന്‍ അഭ്യര്‍ഥിച്ചതിനെത്തുടര്‍ന്നാണ് വാഹനം വിട്ടുനല്‍കിയതെന്നും വാടകയ്ക്ക് നല്‍കിയതല്ലെന്നും ഷമില്‍ കൂട്ടിച്ചേര്‍ത്തു. 

ഇന്നലെ രാത്രി 9.45 ഓടെയാണ് അപകടമുണ്ടായത്. വണ്ടാനത്ത് നിന്ന് സിനിമക്ക് പോകുകയായിരുന്ന വിദ്യാര്‍ഥികളാണ് അപകടത്തില്‍പ്പെട്ടത്. ഒരാള്‍ സംഭവസ്ഥലത്തും നാല് പേര്‍ ആശുപത്രിയില്‍ വെച്ചുമാണ് മരിച്ചത്.