കാട്ടാക്കട : തലസ്ഥാന ജില്ലക്ക് കുടിവെള്ളം കൊടുക്കുന്ന പേപ്പാറ അണക്കെട്ടില്‍ ജലനിരപ്പ് താണു വരുന്ന നിലയില്‍. മഴ കനിഞ്ഞില്ലെങ്കില്‍ ജലനിരപ്പ് താഴുകയും അത് രൂക്ഷമായ കുടിവെള്ള ക്ഷാമത്തിനും ഇടയാക്കുമെന്നാണ് സൂചന.
ഇപ്പോള്‍ 70- 75 ദിവസത്തെ വെള്ളം മാത്രമേ ഇവിടെയുള്ളു. ഇപ്പോള്‍ തന്നെ പേപ്പാറയിലെ മിക്ക ഭാഗങ്ങളും വരണ്ടു തുടങ്ങിയിട്ടുണ്ട് ജല സമൃദ്ധിയാര്‍ന്ന ഭാഗങ്ങളില്‍ ഇപ്പോള്‍ കാണാനാകുന്നത് ചെളിമാത്രമാണ് അതാണ് ആശങ്കയുണര്‍ത്തുന്നത്.
പേപ്പാറയില്‍ ശേഖരിക്കുന്ന കരമനയാറ്റിലെ ജലം അരുവിക്കര വാട്ടര്‍ പ്ലാന്റിലെത്തിച്ച് ശുദ്ധീകരിച്ചാണ് തലസ്ഥാനത്ത് വിതരണം നടത്തുന്നത്.
അരുവിക്കരയിലെ ഷട്ടറുകളും അടച്ചിട്ട അവസ്ഥയാണ് ഇവിടെയും വെള്ളമില്ല അഗസ്ത്യ മലമുടിയില്‍ നിന്നും ജനിക്കുന്ന കരമനയാറില്‍ 1983 ലാണ് പേപ്പാറ അണക്കെട്ട് വരുന്നത്. പിന്നെ അത് വന്യജിവി സങ്കേതവുമായി മാറി.
പേപ്പാറയില്‍ 110 മീറ്റര്‍ വെള്ളമേ ശേഖരിക്കാന്‍ കഴിയൂ. എന്നാല്‍ വന്യജീവി നിയമം വന്നതോടെ ജലനിരപ്പ് 104.5 മീറ്റര്‍ ആയി കുറയ്‌ക്കേണ്ടി വന്നു.
കൂടുതല്‍ ജലനിരപ്പ് വന്നാല്‍ വനഭൂമിയില്‍ വെള്ളം കയറുമെന്നും അത് വന്യജീവി ഉള്‍പ്പെടെയുള്ളവര്‍ക്ക് ദോഷമാകുമെന്നും കാട്ടി ഉത്തരവ് നല്‍കിയതിനാല്‍ ജലനിരപ്പ് മാക്‌സിമം ലവലില്‍ ഉയര്‍ത്താന്‍ കഴിയില്ല.
ഇപ്പോള്‍ അണകെട്ടില്‍ 94 മീറ്റര്‍ വെള്ളമേ ഉള്ളൂ. അനുദിനം കുറഞ്ഞു വരികയുമാണ്. സാധാരണ ഏപ്രില്‍, മേയ് മാസങ്ങളിലാണ് ജലനിരപ്പ് കുറയുന്നത്. എന്നാല്‍ ഇക്കുറി ഡിസംബറില്‍ തന്നെ ജലനിരപ്പ് താണു വന്നുതുടങ്ങി.
നഗരത്തില്‍ ദിവസം 400 മില്യണ്‍ ലിറ്റര്‍ വെള്ളമാണ് വിതരണം നടത്തേണ്ടത്. ജലനിരപ്പ് താണു വരുന്നതിനാല്‍ വെള്ളം മൂന്ന് മാസത്തിനപ്പുറം കൊടുക്കാന്‍ കഴിയില്ല.
2001 മേയിലാണ് ഏറ്റവും കുറച്ച് ജലനിരപ്പ് കാണപ്പെട്ടത് 93.2 മീറ്റര്‍. എന്നാല്‍ മഴ കിട്ടിയില്ലെങ്കില്‍ ജലനിരപ്പ് താഴുമെന്നും ബന്ധപ്പെട്ടവര്‍ പറയുന്നു. മാത്രമല്ല അണക്കെട്ടിന്റെ സംഭരണശേഷിയും നശിച്ചതും ആവശ്യത്തിന് ജലം സംഭരിക്കാനുള്ള ശേഷി ഇല്ലാതാക്കി.
1993 ല്‍ വനത്തില്‍ ഉരുള്‍ പൊട്ടല്‍ നടന്നിരുന്നു. ഇതു വഴി വന്‍ തോതിലാണ് മണല്‍ ഒഴുകിയെത്തി ഡാമില്‍ അടിഞ്ഞു കൂടിയത്.
ഡാം സേഫ്ടി അധികൃതര്‍ നടത്തിയ പഠനത്തില്‍ 75 ശതമാനം ഭാഗത്തും മണല്‍ ശേഖരമുണ്ടെന്ന് കണ്ടെത്തിയിരുന്നു. അമിതമായ തോതില്‍ മണല്‍ അടിയുന്നത് ഡാമിന്റെ സംഭരണശേഷിയെ ബാധിക്കുമെന്നും അതു വഴി ജലനഷ്ടമുണ്ടാകുമെന്നും കണക്കാക്കുന്നുണ്ട്.ഇതു സംബന്ധിച്ച് സര്‍ക്കാരിന് റിപ്പോര്‍ട്ടും നല്‍കിയിട്ടുണ്ട്.
2002 ല്‍ സെന്റര്‍ ഫോര്‍ എര്‍ത്ത് സയന്‍സ് സ്റ്റഡീസ് ഇവിടെ പഠനം നടത്തി. സംഭരണിയിലെ വിവിധ ഭാഗങ്ങളില്‍ പോയി താമസിച്ചാണ് പഠനം നടത്തിയത്. 100 മില്യണ്‍ ക്യൂബിക്ക് മീറ്റര്‍ മണല്‍ ഡാമില്‍ അടിഞ്ഞു കിടക്കുന്നതായി കണ്ടെത്തി. ഇതു വഴി ഡാമിന്റെ 31.5 ശതമാനം സംഭരണശേഷിയും നഷ്ടപ്പെട്ടതായും അവര്‍ മനസിലാക്കി.
ഇങ്ങനെയാകുമ്പോള്‍ നഷ്ടപ്പെടുന്ന ജലത്തിന് ലിറ്റര്‍ ഒരു രൂപ വച്ച് കണക്കാക്കിയാല്‍ 60 ലക്ഷം രൂപയാണ് പ്രതിവര്‍ഷം നഷ്ടം ഉണ്ടാകുന്നതായും പഠനം കാണിക്കുന്നു. മണല്‍ നീക്കം ചെയ്യാത്തത് കാരണം ഡാമിന്റെ ശേഷി കുറഞ്ഞിരിക്കുകയാണ്.