ആലക്കോട്: തേര്‍ത്തല്ലിയില്‍നിന്നു പെരുമ്പടവിലേക്ക് ബൈക്കില്‍ യാത്രചെയ്യുന്നതിനിടെ യുവാവിന് സൂര്യാഘാതമേറ്റു. പെരുമ്പടവ് സ്വദേശിയും തിമിരി ഔവര്‍ കോളജ് വിദ്യാര്‍ഥിയുമായ പുന്നക്കന്‍ മുഹമ്മദിനാണ് ഞായറാഴ്ച ഉച്ചയ്ക്ക് ഒന്നോടെ പൊള്ളലേറ്റത്. കഴുത്തിനും തോളിനും പൊള്ളലേറ്റ മുഹമ്മദ് ആശുപത്രിയില്‍ ചികിത്സ തേടി. മുന്‍കാലങ്ങളില്‍ നിന്നു വ്യത്യസ്തമായി കനത്ത ചൂടാണ് മലയോര മേഖലയില്‍ രേഖപ്പെടുത്തുന്നത്. ഉച്ചസമയത്ത് സൂര്യപ്രകാശം നേരിട്ട് ശരീരത്തില്‍ പതിക്കുന്ന തരത്തിലുള്ള യാത്രകള്‍ ഒഴിവാക്കണമെന്ന് ആരോഗ്യ വകുപ്പ് അധികൃതര്‍ അറിയിച്ചു.