എടപ്പാള്‍: മഹാകവി അക്കിത്തത്തിന്റെ തിരഞ്ഞെടുത്ത കവിതകളുടെ ഇംഗ്ലിഷ് പരിഭാഷ വള്ളത്തോള്‍ വിദ്യാപീഠത്തില്‍ നടന്ന ചടങ്ങില്‍ നിരൂപകന്‍ കെ.പി ശങ്കരന്‍, കവി കെ.വി രാമകൃഷ്ണനു നല്‍കി പ്രകാശനം ചെയ്തു. എസ്.കെ വസന്തന്‍ അധ്യക്ഷനായി.
മഹാകവി അക്കിത്തം, ഡോ. ചാത്തനാത്ത് അച്യുതനുണ്ണി, പി.എം.നാരായണന്‍, സി.വി.ഗോവിന്ദന്‍, ഉണ്ണിക്കൃഷ്ണന്‍ ചെറുതുരുത്തി, അച്യുതന്‍ വടക്കേടത്ത്, രമ്യ സഞ്ജീവ്, പി.കെ.എന്‍.പണിക്കര്‍ എന്നിവര്‍ സംസാരിച്ചു. അക്കിത്തത്തിന്റെ തിരഞ്ഞെടുത്ത 32 കവിതകളാണ് 'സിലക്ടഡ് പോയംസ് ഓഫ് അക്കിത്തം ഫ്രം ഗോഡ്‌സ് ഓണ്‍ കണ്‍ട്രി' എന്ന പേരില്‍ ഇംഗ്ലിഷിലേക്കു പരിഭാഷപ്പെടുത്തിയത്.
കെമിക്കല്‍ എന്‍ജിനീയറും എഴുത്തുകാരനുമായ പി.കെ.എന്‍ പണിക്കരാണ് ഇംഗ്ലിഷിലേക്ക് പരിഭാഷപ്പെടുത്തിയിരിക്കുന്നത്. അക്കിത്തത്തിന്റെ പ്രശസ്ത കവിതകളായ ഇരുപതാം നൂറ്റാണ്ടിന്റെ ഇതിഹാസം, വെണ്ണക്കല്ലിന്റെ കഥ, സ്പര്‍ശ മണികള്‍, വാടാത്ത താമരയും കെടാത്ത സൂര്യനും പരമ ദുഃഖം, പരഭാഗ ഭംഗി തുടങ്ങിയവ ഈ സാമാഹാരത്തില്‍ വിവര്‍ത്തനം ചെയ്ത കവിതകളുടെ കൂട്ടത്തിലുണ്ട്.