കൊല്ലം: കൊല്ലം അസി. എക്‌സൈസ് കമ്മിഷണറുടെ നേതൃത്വത്തിലുള്ള പ്രത്യേക ഷാഡോ സംഘം നടത്തിയ റെയ്ഡില്‍ രണ്ട് കിലോ കഞ്ചാവ് പിടികൂടി. രണ്ട് പേര്‍ക്കെതിരേ കേസെടുത്തു.
പെരുമ്പുഴ തുണ്ടുവിള വീട്ടില്‍ ഷെഫീക്ക് (24) ഇയാളുടെ സഹോദരന്‍ അജ്മീര്‍ ഖാന്‍ (22) എന്നിവര്‍ക്കെതിരെയാണ് കേസെടുത്തത്.
ഇവരുടെ വീട്ടില്‍ വന്‍തോതില്‍ കഞ്ചാവ് സൂക്ഷിച്ചു വില്‍പ്പന നടത്തുന്നുവെന്ന് വിവരം ലഭിച്ചത് പ്രകാരം ഷാഡോ സംഘം വീട്ടിലെത്തുകയും തുടര്‍ന്ന് അന്‍പതോളം നാട്ടുകാരും ചേര്‍ന്ന് വീട്ടിലും പരിസരത്തും നടത്തിയ തിരച്ചിലില്‍ വലുതും ചെറുതുമായ പൊതികളാക്കി ഒളിപ്പിച്ചിരുന്ന രണ്ട് കിലോയോളം കഞ്ചാവ് കണ്ടെത്തിയത്.
പ്രതികള്‍ തമിഴ്‌നാട്ടില്‍ നിന്നും ആണ് കഞ്ചാവ് എത്തിച്ചതെന്നാണ് പ്രാഥമിക വിവരം. ഒളിവില്‍പോയ പ്രതികള്‍ക്കായി തിരച്ചിലാരംഭിച്ചതായും ഉടന്‍ പിടികൂടുമെന്നും അന്വേഷണസംഘം അറിയിച്ചു.
പ്രതികള്‍ രണ്ടുപേരും മുന്‍പ് പീഡനക്കേസുകള്‍ ഉള്‍പ്പെടെയുള്ള കേസുകളില്‍ പ്രതികളായിട്ടുള്ളവരാണ്.
ജാമ്യത്തിലിറങ്ങിയ ശേഷം കഞ്ചാവ് വില്‍പ്പന നടത്തുകയായിരുന്നു. റെയ്ഡില്‍ അസി.എക്‌സൈസ് കമ്മിഷണര്‍ പി.കെ.സനു, ഇന്‍സ്‌പെക്ടര്‍ ബിജു എന്‍.ബേബി, ഷാഡോ ടീംഗങ്ങളായ ബി.ദിനേഷ്, അരുണ്‍ ആന്റണി, വിഷ്ണുരാജ്, ലാല്‍, ശരത് പങ്കെടുത്തു.