മംഗളൂരു: സമസ്ത സീനിയര്‍ ഉപാധ്യക്ഷനും നൂറിലധികം മഹല്ലുകളുടെ ഖാസിയുമായിരുന്ന സി.എം. അബ്ദുല്ല മൗലവിയുടെ കൊലപാതകവുമായി ബന്ധപ്പെട്ട കേസില്‍ സി.ബി.ഐ ഓഫിസ് ഉപരോധിക്കുമെന്ന് എസ്.കെ.എസ്.എസ്.എഫ് ദക്ഷിണ കന്നഡ ജില്ലാ കമ്മിറ്റിയും ഖാസി സംയുക്ത സമര സമിതിയും പ്രഖ്യാപിച്ചു.
കേസില്‍ അന്വേഷണം ഊര്‍ജിതമാക്കി പ്രതികളെ ഉടന്‍ നിയമത്തിന് മുന്നില്‍ കൊണ്ടുവരണമെന്ന് ആവശ്യപ്പെട്ട് ഇന്നലെ നടത്തിയ മംഗളൂരു ഡെപ്യൂട്ടി കമ്മിഷണര്‍ ഓഫിസ് ധര്‍ണയിലാണ് കര്‍ണാടകയിലേയും കേരളത്തിലെയും സി.ബി.ഐ ഓഫിസുകള്‍ ഉപരോധിക്കുമെന്ന പ്രഖ്യാപനം നടത്തിയത്.
പ്രതികളെ നിയമത്തിന് മുന്നില്‍ കൊണ്ടുവരുന്നതിന് വേണ്ടിയുള്ള നടപടികള്‍ സ്വീകരിക്കണമെന്ന് ആവശ്യപ്പെട്ട് ഡെപ്യൂട്ടി കമ്മിഷണര്‍ മുഖേന ഭാരവാഹികള്‍ പ്രധാനമന്ത്രിക്ക് നിവേദനവും നല്‍കി. ഇതേ ആവശ്യം ഉന്നയിച്ച് 31 നകം 25,000 ഇ മെയില്‍ സന്ദേശങ്ങളും പ്രധാനമന്ത്രിക്ക് അയക്കും.
ചടങ്ങ് ത്വാഖ അഹമ്മദ് അല്‍ അസ്ഹരി ഉദ്ഘാടനം ചെയ്തു. ഖാസിം ദാരിമി അധ്യക്ഷനായി.
സമര സമിതി ഭാരവാഹികളായ കെ.മുഹമ്മദ് കുഞ്ഞി, ഹമീദ് കുണിയ, ഇസ്മാഈല്‍ യമാനി, സിദ്ദിഖ് ബണ്ട്വാള്‍, ഹാജി ഹനീഫ് തുടങ്ങിയവര്‍ സംസാരിച്ചു.