ന്യൂഡല്‍ഹി: കോണ്‍ഗ്രസിന്റെ സമ്പൂര്‍ണ സമ്മേളനത്തിന് ഇന്നു തുടക്കം. രാവിലെ 9ന് ഇന്ദിര ഗാന്ധി ഇന്‍ഡോര്‍ സ്റ്റേഡിയത്തില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി പതാക ഉയര്‍ത്തുന്നതോടെ പ്ലീനറി സമ്മേളനത്തിന്റെ ഔദ്യോഗിക നടപടികള്‍ ആരംഭിക്കും. 
ഉച്ചക്ക് രണ്ടോടെ പ്രമേയങ്ങളിന്മേലുള്ള ചര്‍ച്ച ആരംഭിക്കും. കോണ്‍ഗ്രസ് അധ്യക്ഷനായി രാഹുല്‍ ഗാന്ധി ഔദ്യോഗികമായി ചുമതലയേല്‍ക്കുന്ന സമ്മേളനത്തില്‍ വര്‍ക്കിങ് കമ്മിറ്റി അംഗങ്ങളുടെ തെരഞ്ഞെടുപ്പും നടക്കും. 1500ലധികം എ.ഐ.സി.സി പ്രതിനിധികളും സംസ്ഥാനങ്ങളില്‍ നിന്നുള്ള 5000ല്‍ അധികം പി.സി.സി പ്രതിനിധികളും പങ്കെടുക്കും. കേരളത്തില്‍ നിന്ന് മുന്നൂറോളം പ്രതിനിധികള്‍ പങ്കെടുക്കുന്നുണ്ട്. സമ്മേളനത്തിന്റെ ഭാഗമായി സ്റ്റിയറിങ് കമ്മിറ്റി യോഗം ഇന്നലെ നടന്നു. 
ലോക്‌സഭാ തെരഞ്ഞെടുപ്പും അതിനു മുമ്പായി വരുന്ന കര്‍ണാടക, രാജസ്ഥാന്‍, മധ്യപ്രദേശ്, ചത്തിസ്ഗഡ് നിയമസഭാതെരഞ്ഞെടുപ്പുകളിലും സ്വീകരിക്കേണ്ട തന്ത്രങ്ങളാണ് സമ്മേളനത്തിലെ മുഖ്യ അജണ്ട.