യാമ്പു: യാമ്പു മലയാളി അസോസിയേഷന്‍ (വൈ.എം.എ) പുറത്തിറക്കിയ 'കനലടയാളങ്ങള്‍' എന്ന പേരിലുള്ള മാഗസിന്‍ പ്രൗഡമായ സദസ്സില്‍ പ്രകാശനം ചെയ്തു.

ജിദ്ദയിലെ 'സമീക്ഷ' ചെയര്‍മാന്‍ ഗോപി നെടുങ്ങാടി എഴുത്തുകാരനായ അബു ഇരിങ്ങാട്ടിരിക്ക് ആദ്യ കോപ്പി നല്‍കിയാണ് പ്രകാശന കര്‍മം നിര്‍വഹിച്ചത്.

യാമ്പു നാജില്‍ അറബ് ഓഡിറ്റോറിയത്തില്‍ നടന്ന പരിപാടിയില്‍ വൈ.എം.എ പ്രസിഡന്റ് അബൂബക്കര്‍ മേഴത്തൂര്‍ ആധ്യക്ഷത വഹിച്ചു.

പ്രവാസം ഒരു ജനതക്കു മുമ്പില്‍ അവശേഷിപ്പിച്ച സര്‍ഗഭാവങ്ങളെയും സാംസ്‌കാരികമായ ഈടുവെപ്പുകളെയും പറ്റി പ്രമുഖ ചിന്തകരുടെയും എഴുത്തുകാരുടെ യും പഠനങ്ങളും സംവാദങ്ങളും നിരീക്ഷണങ്ങളും ഉള്‍കൊള്ളുന്ന മാഗസിന്‍ ഉന്നത നിലവാരം പുലര്‍ത്തിയെന്നും സമൂഹത്തില്‍ ഏറെ സ്വാധീനം ചെലുത്താന്‍ ഇതിന് കഴിയുമെന്നും പരിപാടിയില്‍ സംസാ രിച്ച ഗോപി നെടുങ്ങാടി, അബു ഇരിങ്ങാട്ടിരി എന്നിവര്‍ അഭിപ്രായപ്പെട്ടു.

പ്രവാസമെന്ന സാംസ്‌കാരികാനുഭവത്തിന് മുന്നില്‍ സമര്‍പ്പിക്കുന്ന നൈവേദ്യമാണ് 'കനലടയാളങ്ങള്‍' എന്ന ഈ കരുത്തുറ്റ മാഗസിനെന്ന് പുസ്തക പരിചയം നടത്തി സംസാരിച്ച വൈ.എം.എ വൈസ് പ്രസി ഡന്റ് സലിം വേങ്ങര പറഞ്ഞു.

യാമ്പുവിലെ വിവിധ സാംസ്‌കാരിക സാമൂഹ്യ രാഷ്ട്രീയ സംഘടനകളുടെ നേതാക്കള്‍ ചടങ്ങില്‍ സംബന്ധിച്ചു.
വൈ.എം.എ ജനറല്‍ സെക്രട്ടറി അബ്ദുല്‍ കരീം പുഴക്കാട്ടിരി സ്വാഗതവും ട്രഷറര്‍ അഷ്‌ക്കര്‍ വണ്ടൂര്‍ നന്ദിയും പറഞ്ഞു.