തിരുവനന്തപുരം: കേരളത്തില്‍ പുതിയ ബാറുകള്‍ തുറക്കാന്‍ സര്‍ക്കാര്‍ തീരുമാനിച്ചിട്ടില്ലെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. പുതിയ മദ്യനയം തീരുമാനിച്ചിട്ടില്ല. ഇക്കാര്യത്തില്‍ സുപ്രിംകോടതി വിധി നടപ്പാക്കുകയാണ് ചെയ്തതെന്നും അദ്ദേഹം പറഞ്ഞു.

സര്‍ക്കാര്‍ പുതിയ കാര്യം നടപ്പാക്കുന്നു പോലെ തെറ്റായ പ്രചാരമാണ് രണ്ടു ദിവസമായി കേരളത്തില്‍ നടക്കുന്നതെന്നും സര്‍ക്കാരിന്റെ പ്രവര്‍ത്തനങ്ങളെ മാധ്യമങ്ങള്‍ വക്രീകരിച്ചു കാണിക്കുകയാണെന്നും കോടിയേരി ബാലകൃഷ്ണന്‍ ആരോപിച്ചു.

സുപ്രിംകോടതി ഉത്തരവ് പ്രകാരം സംസ്ഥാനത്തെ പഞ്ചായത്തുകളില്‍ അടച്ചുപൂട്ടിയവയല്ലാതെ പുതുതായി ഒരു മദ്യശാലപോലും തുറക്കില്ലെന്ന് എക്‌സൈസ് മന്ത്രി ടി.പി രാമകൃഷ്ണനും ഇന്നലെ വ്യക്തമാക്കിയിരുന്നു.

സര്‍ക്കാരിന്റെ പുതിയ ഉത്തരവിന്റെ അടിസ്ഥാനത്തില്‍ മൂന്ന് ബാറുകളും 171 ബിയര്‍ വൈന്‍ പാര്‍ലറുകളും ആറ് ബിവറേജസ് ഔട്ട്‌ലെറ്റുകളും ഒരു ക്ലബും മൂന്ന് സൈനിക കാന്റീനുകളും 499 കള്ളുഷാപ്പുമാണ് തുറക്കുക. ഇവയെല്ലാം യു.ഡി.എഫ് ഭരണകാലത്ത് പ്രവര്‍ത്തിച്ചിരുന്നവയും 2016 ഡിസംബറിലെ കോടതി ഉത്തരവിനെ തുടര്‍ന്ന് പൂട്ടിയവയുമാണ്.

2016 ല്‍ എല്‍.ഡി.എഫ് സര്‍ക്കാര്‍ അധികാരത്തില്‍ വരുമ്പോള്‍ സംസ്ഥാനത്ത് 29 ഫൈവ് സ്റ്റാര്‍ ബാറുകളും 813 ബിയര്‍വൈന്‍ പാര്‍ലറുകളും 4234 കള്ള്ഷാപ്പുകളും 306 ബിവറേജസ് ഔട്ട്‌ലെറ്റുകളും 34 ക്ലബുകളും പ്രവര്‍ത്തിക്കുന്നുണ്ടായിരുന്നു.