ദമസ്‌കസ്: കിഴക്കന്‍ ഗൂഥയില്‍ ഭൂഗര്‍ഭ സ്‌കൂളിനുനേരെ സിറിയന്‍ സൈന്യം വ്യോമാക്രമണം നടത്തി. സംഭവത്തില്‍ 15 കുട്ടികളും രണ്ട് സ്ത്രീകളും കൊല്ലപ്പെട്ടു. നഗരത്തിനടുത്ത അര്‍ബിന്‍ മേഖലയിലായിരുന്നു സംഭവം. സര്‍ക്കാര്‍ സൈന്യത്തിന്റെയും റഷ്യയുടെ യും വ്യോമാക്രമണം ഭയന്ന് നാട്ടുകാരായ ഇവര്‍ ഇവിടെ ഒളിച്ചുകഴിയുകയായിരുന്നു.
ഫൈലാഖുറഹ്മാന്‍ എന്ന വിമതസംഘത്തിന്റെ നിയന്ത്രണത്തിലുള്ള തെക്കന്‍ മേഖലയാണ് അര്‍ബിന്‍. ഇവിടെയുള്ള ഭൂഗര്‍ഭ സ്‌കൂളിനു നേരെ മൂന്ന് മിസൈലുകള്‍ വര്‍ഷിച്ചതായി സിറിയന്‍ ഒബ്‌സര്‍വേറ്ററി ഫോര്‍ ഹ്യുമന്‍ റൈറ്റ്‌സ് അറിയിച്ചു. ആക്രമണത്തില്‍ 50 പേര്‍ക്ക് ഗുരുതരമായി പരുക്കേല്‍ക്കുകയും ചെയ്തിട്ടുണ്ട്. കിഴക്കന്‍ ഗൂഥയില്‍ ഇതുവരെയായി 1,400 പേര്‍ കൊല്ലപ്പെട്ടതായാണ് ഔദ്യോഗിക വിവരം.