കുറ്റിപ്പുറം: ദേശീയപാതയ്ക്കു ഭൂമി ഏറ്റെടുക്കുന്നതിന്റെ ഭാഗമായി കഴിഞ്ഞ ദിവസം മുതല്‍ ആരംഭിച്ച സര്‍വേ നടപടികള്‍ ഇന്നലെയും കുറ്റിപ്പുറത്തു തുടര്‍ന്നു. ഒരു കിലോമീറ്ററിലാണ് സര്‍വേ നടപടികള്‍ അവസാനിപ്പിച്ചത്. ഡെപ്യൂട്ടി കലക്ടര്‍ ഡോ. ജെ. അരുണിന്റെ നേതൃത്വത്തിലാണ് സര്‍വേ.
നാളെയും മറ്റന്നാളുമായി കുറ്റിപ്പുറം ഭാഗങ്ങളിലെ സര്‍വേ പൂര്‍ത്തീകരിച്ചു മറ്റു പ്രദേശങ്ങളിലേക്കു പ്രവേശിക്കാനാകുമെന്ന വിശ്വാസത്തിലാണ് റവന്യൂ അധികൃതര്‍.
ശക്തമായ പൊലിസ് കാവലിലാണ് ഇന്നലെയും സര്‍വേ പുരോഗമിച്ചത്. എന്നാല്‍, കഴിഞ്ഞ ദിവസത്തെപ്പോലെ ഇന്നലെ പ്രതിഷേധം കാണാനായില്ല. കുറ്റിപ്പുറത്തു നടക്കുന്ന സര്‍വേ പ്രദേശവാസികള്‍ക്കു കാര്യമായ നാശ നഷ്ടം ഉണ്ടാക്കുന്നില്ല. ഇവിടെ സര്‍ക്കാര്‍ ഭൂമികളിലാണ് സര്‍വേ കല്ലുകള്‍ കുത്തുന്നത്. ഇതാണ് പ്രതിഷേധം നടക്കാത്തതിനു കാരണമെന്നാണ് നിഗമനം.