സൂറത്ത്: പഞ്ചാബ് നാഷനല്‍ ബാങ്കിനെ കബളിപ്പിച്ച് 13,000 കോടിയിലധികം രൂപ തട്ടിയ കേസിലെ മുഖ്യപ്രതി നീരവ് മോദിക്കെതിരേ നികുതി വെട്ടിപ്പുകേസും. ഗുജറാത്തിലെ പ്രത്യേക സാമ്പത്തിക മേഖലയിലേക്ക് 890 കോടിയുടെ ആഭരണങ്ങള്‍ നികുതിയടക്കാതെ കടത്തിയെന്നാണ് ഡിപ്പാര്‍ട്ടുമെന്റ് ഓഫ് റവന്യൂ ഇന്റലിജന്‍സ്(ഡി.ആര്‍.ഐ) കണ്ടെത്തിയത്.
വിദേശത്തു നിന്ന് പലതവണയായിട്ടാണ് ഇത് എത്തിച്ചതെന്നും വിശദമായ അന്വേഷണം നടത്തിക്കൊണ്ടിരിക്കുകയാണെന്നും ഡി.ആര്‍.ഐ അറിയിച്ചു. 2014ലും നികുതിയടക്കാതെ ഇയാള്‍ ആഭരണങ്ങള്‍ എത്തിച്ചതായി കണ്ടെത്തിയിരുന്നു. അന്ന് 48 കോടി രൂപ പിഴയടച്ചാണ് നീരവ് രക്ഷപ്പെട്ടത്. പി.എന്‍.ബിയുടെ ജാമ്യപത്രം ഉപയോഗിച്ച് നീരവ് മോദിയും അമ്മാവന്‍ മെഹുല്‍ ചോക്‌സിയും ഇന്ത്യയിലേക്ക് പണം എത്തിച്ചത് ഹവാല വഴിയായിരുന്നുവെന്നും കണ്ടെത്തിയിട്ടുണ്ട്.
കൂടുതല്‍ പണവും മുംബൈ കേന്ദ്രമായി പ്രവര്‍ത്തിക്കുന്ന കമ്പനിയിലേക്കാണ് അയച്ചിരുന്നത്. വ്യാജ വിലാസത്തില്‍ നിന്നാണ് പണം ഇന്ത്യയിലേക്ക് എത്തിയിരുന്നത്. ഇതുസംബന്ധിച്ച് വ്യക്തമായ വിവരങ്ങള്‍ ലഭിച്ചിട്ടുണ്ടെന്നും അന്വേഷണസംഘം പറയുന്നു. വിദേശ രാജ്യങ്ങളില്‍ നിന്ന് മെഹുല്‍ ചോക്‌സി തന്റെ ഉടമസ്ഥതയിലുള്ള ഗീതാഞ്ജലി ജെംസിലേക്കാണ് അയച്ചിരുന്നത്. ഈ തുക പിന്നീട് ചില നിഴല്‍ കമ്പനികളിലേക്ക് മാറ്റുകയായിരുന്നു.
ഇതിനിടയില്‍ പി.എന്‍.ബിയിലെ ചില ജീവനക്കാര്‍ക്ക് വിദേശത്തും അക്കൗണ്ടുകള്‍ ഉള്ളതായി അന്വേഷണസംഘം കണ്ടെത്തി. വായ്പാ തട്ടിപ്പില്‍ ഉള്‍പ്പെട്ടിരുന്ന ജീവനക്കാര്‍ക്കെതിരേ കൂടുതല്‍ അന്വേഷണം നടത്തുമെന്നും വിദേശത്തുള്ള സ്വത്തുക്കള്‍ തിരിച്ചെത്തിക്കാനുള്ള നടപടികള്‍ സ്വീകരിക്കുമെന്നും പി.എന്‍.ബി വ്യക്തമാക്കി.